सिरी-ए क्लब साम्प्डोरियाका पाँच खेलाडीमा कोरोना भाइरस संक्रमण
<p>काठमाडौं(एजेन्सी)। इटालियन 'सिरी-ए' क्लब साम्प्डोरियाका पाँचजना खेलाडीमा कोरोना भाइरसको संक्रमण पुष्टि भएको छ।</p>
<p>क्लबले ३० फागुन साँझ यसको पुष्टि गरेको गोलडटकमले जनाएको छ।</p>
<p>साम्प्डोरियाले जारी गरेको वक्तव्यअनुसार रक्षक ओमार कोली, मिडफिल्डर अल्बिन एक्डल, फरवार्ड एन्टोलिनो ला गुमिना र मिडफिल्डर मोर्टेन थोर्स्बीको कोरोना भाइरस संक्रमण पुष्टि भएको हो।</p>
<p>क्लबले यसअघि नै फरवार्ड मनोलो गाबियादिनी कोरोना भारस संक्रमणको शिकार भएको पुष्टि गरिसकेको छ।</p>
<p>यूरोपको प्रतिष्ठितमध्येको फुटबल लिग 'सिरी-ए'का लागि यो स्तब्ध पार्ने घटना हो। साम्प्डोरिया 'सिरी-ए'को अंक तालिकामा १६ औं स्थानमा छ। पहिलो स्थानमा क्रिष्टियानो रोनाल्डोको टिम युभेन्टस छ।</p>
<p>युभेन्टसका डिफेन्डर ड्यानियल रुगानीमाथि कोरोना भाइरस संक्रमण भएको यसअघि नै पुष्टि भइसकेको छ।</p>
<p>उता इंग्ल्याण्डमा इंग्लिस प्रिमियर लिग क्लब आर्सनलका प्रशिक्षक मिकेल आर्टेटा र चेल्सीका विंगर कालम हड्सन ओडोईमाथि कोरोना भाइरस संक्रमण भएको यसअघि नै सार्वजनिक भइसकेको छ।</p>
<p>कोरोना भाइरसको बढ्दो संक्रमणका कारण यूरोपेली च्याम्पियन्स लिग, इंग्ल्याण्डको इंग्लिस प्रिमियर लिग, स्पेनको ला लिगा, इटलीको सिरी ए, जर्मनीको बुन्डेसलिगालगायत सबै प्रतियोगिता स्थगित भइसकेका छन्।</p>
प्रतिक्रिया दिनुहोस्
.jpg)
