नेपाल-भारत सीमाको जमुनाह नाकामा सवारी आवागमनमा रोक
<p>नेपालगंज। कोरोना भाइरस संक्रमणको सम्भावित जोखिमलाई ध्यान दिँदै बाँकेको मुख्य नेपाल-भारत सीमाको जमुनाह नाकामा सवारी साधन संचालनमा रोक लगाइएको छ।</p>
<p>हिजो, ५ चैतबाट साइकलदेखि ठूला सवारीसाधनसम्म आवतजावतमा रोक लगाइएको हो।</p>
<p>नेपाल र भारतका सुरक्षा अधिकारीको बैठकले सवारी आवागमनमा रोक लगाउने निर्णय गरेको हो।</p>
<p>बिहानैदेखि टेन्ट लगाएर स्वास्थ्यकर्मीले नाकामा प्रवेश गर्ने हरेकको अनिवार्य स्वास्थ्य परीक्षण गरिरहेका छन् ।</p>
<p>नेपालतर्फ चौलिक्का चोकसम्म मात्र सवारीसाधन सञ्चालन गर्न दिइएको छ।</p>
<p>सवारीसाधन संचालनमा रोक लगाए पनि पैदल आवातजावत भने यथावत रहेको बाँकेका प्रमुख जिल्ला अधिकारी कुमारबहादुर खड्काले जानकारी दिए।</p>
<p>कोभिड-१९ को त्राससँगै अहिले भारतबाट घर फर्किने नेपालीको संख्या बढ्दो छ।</p>
<p>भारतमा कोरोना भाइरस संक्रमणका बिरामी देखिएसँगै नेपालमा भित्रिन सक्ने भन्दै सतर्कतास्वरूप जमुनाह नाका बन्द गर्नुपर्ने स्थानीयले माग गरेका थिए।</p>
<p>तर, यहाँको व्यापार व्यवसायमा प्रतिकूल प्रभाव परे पनि भारतबाट आउने मालसामान भने रोकिएका छैनन्।</p>
<p>सीमानाकामा आवतजावतमा कडाइ भए पनि सामान आयात तथा निर्यात भने जारी नै रहेको नेपालगंज भन्सार कार्यालयले जनाएको छ ।</p>
<p>“भारतबाट मालसामान आयातमा वृद्धि भएकाले अहिले विगतको भन्दा दैनिक एक करोड बढी राजश्‍व संकलन भइरहेको छ”, भन्सार कार्यालयका प्रमुख शान्तिराम निरौलाले बताए। <em>रासस</em></p>
प्रतिक्रिया दिनुहोस्
.jpg)
