सिंगापुरबाट काठमाडौं आएको सिल्क एयरका यात्रुलाई तीन घण्टापछि ओरालियो
<p>काठमाडौं। कोरोना भाइरस संक्रमणको जोखिमबाट बच्‍च सरकारले प्रतिबन्ध लगाएका मुलुकका नागरिक लिएर आएको भन्दै फर्काउन खोजिएको सिल्क एयरका यात्रुलाई झण्डै तीन घण्टापछि जहाजबाट ओरालिएको छ।</p>
<p>सिंगापुरबाट आएको त्यो जहाज गएराति करीब साढे ८ बजे काठमाडौंस्थित त्रिभुवन अन्तर्राष्‍ट्रिय विमानस्थल अवतरण गरेको थियो।</p>
<p>शुरूमा नागरिक उड्डयन प्राधिकरणले ढोका नखोली फ्यूल मात्र भरेर जहाजलाई फिर्ता पठाउन निर्देशन दिएको विमानस्थल स्रोतले बताएको छ।</p>
<p>त्यहाँ नेपाली मुलका नेदरल्याण्ड्सका नागरिकसहित ८५ जना यात्रु रहेको बताइएको छ।</p>
<p>तर, आइसकेका नागरिकलाई फर्काउँदा सन्देश राम्रो नजाने भएपछि ती यात्रुहरूलाई ओराल्ने निर्णय गरिएको हो।</p>
<p>विमानस्थल अध्यागमन कार्यालयका प्रमुख सागर आचार्यका अनुसार सिल्क एयरबाट आएका ८५ जना यात्रुमध्ये तीनजनालाई भक्तपुरको खरिपाटीस्थित क्वारेन्टाइनमा पठाइएको छ।</p>
<p>बाँकी ८२ जनालाई होम क्‍वारेन्टाइनमा बस्‍ने गरी पठाइएको आचार्यले जानकारी दिए।</p>
<p>"हामीकहाँ आइपुग्दा राति साढे १२ बजेको थियो", आचार्यले देखापढीसँग भने, "स्वास्थ्य परीक्षण गरेर काउन्सिलिङपश्‍चात उनीहरूको विस्तृत विवरण राखेर पठाइएको छ।"</p>
<p>उनले भने, "नेदरल्याण्ड्स घुमेर आएका व्यक्ति पनि रहेको थाहा पाएपछि केहीबेर जहाज होल्ड गरिएको हो।"</p>
प्रतिक्रिया दिनुहोस्
.jpg)
