पूर्वकप्तान पारस खड्काको अनुरोध- ‘अत्यावश्यक काममा बाहेक घरबाट ननिस्कौँ’
<p>काठमाडौं। नेपाली क्रिकेट टोलीका पूर्वकप्तान पारस खड्काले कोरोना भाइरस संक्रमणबाट सुरक्षित रहन घरमै बसेर नेपाल सरकारलाई सहयोग गरिदिन आह्वान गरेका छन्।</p>
<p>नेपालका ब्याटिङ अलराउन्डर पारस खड्काले आज सामाजिक सञ्‍जाल इन्स्टाग्राममा भिडिओ सन्देश पोष्ट गर्दै यो विषम परिस्थितिमा सबैले आफ्नो जिम्मेवारी लिएर सचेत हुनुपर्ने बताएका छन्।</p>
<p>‘‘हामी सबैको लागि यो समय सहज छैन। अहिलेको यो परिस्थितीमा मेरो व्यक्तिगत र नेपाल क्रिकेट टीमको तर्फबाट सबै जनालाई आग्रह गर्न चाहन्छु की अत्यावश्यक कामबाहेक घरमै बसेर नेपाल सरकार र सम्बधित निकायलाई सहयोग गरिदिनुहुन हार्दिक आग्रह गर्दछु,’’ झण्डै एक दशक नेपाली क्रिकेट टीमको नेतृत्व गरेका पारसले भनेका छन्, ‘‘हामी सबैले आफ्नोतर्फ जिम्मेवारी निर्वाह गर्नु महत्वपूर्ण छ। सबैले आ-आफ्नो तर्फबाट जिम्मेवारी लिने हो भने यो परिस्थितीबाट अघि बढ्न सजिलो हुनेछ। सबै जना एकजुट भएर यो महामारीविरुद्ध लडौँ।’’</p>
<p>नेपाली क्रिकेट टीमका कप्तान ज्ञानेन्द्र मल्लले पनि इन्स्टाग्राममा कोभिड-१९ बाट बच्नका लागि सचेतनामूलक तस्वीर पोष्ट गरेका छन्।</p>
<p>उनले पोष्ट गरेको तस्वीरमा नमस्ते गरौं, नियमित हात धोऔंलगायतको सन्देश छन्।</p>
<p>त्यस्तै १३औं दक्षिण एसियाली खेलकुद प्रतियोगितामा नेपाली फुटबल टीमको कप्तानी गरेका सुजल श्रेष्ठले पनि कोरोना भाइरस संक्रमणबाट बच्‍न विश्व स्वास्थ्य संगठनको निर्देशन पालना गर्न अनुरोध गरेका छन्।</p>
<p>उनले भाइरसबाट बच्न भिडभाडमा नजान आग्रह गर्दै सबैजना मिलेर यसबाट बच्न आग्रह गरेका छन्।</p>
प्रतिक्रिया दिनुहोस्
.jpg)
