भारतसँग सीमा जोडिएको जमुनाहसहित बाँकेका सबै नाका एक साताका लागि बन्द
<p>काठमाडौं। विश्‍वव्यापी महामारी बनेको कोरोना भाइरस(कोभिड-१९) को जोखिमबाट बच्न भारतसँग सीमा जोडिएका बाँकेका सबै नाकाहरू एक साताका लागि बन्द गरिएको छ।</p>
<p>बाँके जिल्लाका सुरक्षा निकायका प्रमुख र भारतको उत्तरप्रदेशको बहराइच जिल्लाका सुरक्षा प्रमुखको केहीबेर अघि सम्पन्‍न दुईपक्षीय बैठकले एकहप्ताका लागि नेपाल-भारतका सीमा नाका बन्द गर्ने निर्णय गरेको हो।</p>
<p>बाँकेका प्रमुख जिल्ला अधिकारी कुमारबहादुर खड्काले दुवै देशका अधिकारीहरूबीचको छलफलपछि एकसाताका लागि सीमा नाका बन्द गर्ने निर्णय भएको जानकारी दिए।</p>
<p>“हामीले अत्यावश्यक सेवा, मालवाहक सवारी साधन संचालन रोक नलगाउने निर्णय गरेका छौं”, उनले <em>देखापढी</em>सँग भने,“यात्रुहरूको आवागमन भने पूर्ण रूपमा नै बन्द हुनेछ।”</p>
<p>उनले भारतसँग सीमा जोडिएको मुख्य नाका जमुनाहसहितका सबै नाकाहरूमा आजैदेखि आवागमन सबै बन्द भएको जानकारी दिए।</p>
<p>दुवै देशमा हुने निर्वाचनका बेला पनि स्थानीय स्तरमा अधिकारीहरूले सीमा नाका बन्द गर्दै आएका थिए।</p>
प्रतिक्रिया दिनुहोस्
.jpg)
