कोभिड-१९ बाट जोगिन अष्ट्रेलियामा लकडाउनको तयारी
<p>काठमाडौं। अष्ट्रेलियाका प्रधानमन्त्री स्कट मरिसनले कोभिड-१९ को महामारी फैलिन नदिन ‘लकडाउन घोषणा’ गरिनसक्ने जनाएका छन्।</p>
<p>सरकारले अत्यावश्यक काममा बाहेक घरमै बस्न अनुरोध गर्दागर्दै पनि ८ चैतमा सिड्नीको बोन्डी लगायतका सुमद्री किनारमा मानिसहरूको भीड जम्मा भएपछि अष्ट्रेलियाली सरकारले त्यस्तो तयारी गरेको हो। ५०० भन्दा बढी मानिस जम्मा भएपछि बोन्डी समुद्री किनार बन्द गरिएको थियो। </p>
<p>प्रधानमन्त्री मरिसनले समुद्री किनारमा जम्मा भएको भीड ‘गम्भीर नीति अपनाउन ढिलो भइसकेको चेतावनी’ भएको बताएका छन्।</p>
<p>उनले यो विश्वव्यापी महामारीका कारण अर्थतन्त्रमा आएको क्षति न्युन गर्न वित्तीय प्याकेजको घोषणा पनि गरे।</p>
<p>पछिल्ला दिनमा अष्ट्रेलियामा कोरोना भाइरस संक्रमण निरन्तर बढिरहेछ। विश्व स्वास्थ्य संगठनले सार्वजनिक गरेको पछिल्लो प्रतिवेदन अनुसार ८ चैतसम्म त्यहाँ संक्रमितको संख्या ८७३ पुगेको छ भने ७ जनाको निधन भइसकेको छ। </p>
<p>प्रधानमन्त्री मरिसनले अष्ट्रेलियाका जनतालाई सरकारले तोकेका नियम पालना गर्न अनुरोध गरेका छन्। </p>
<p>"एक अर्काबीच आवश्यक दूरी कायम गर्नुहोस्", उनले भने।</p>
<p>उनले आज छलफल गरेपछि कठोर नीति अपनाइने जनाएका छन्। उनले ठूलो संख्यामा संक्रमित फेला परेका क्षेत्रमा लकडाउन घोषणा गरिने बताएका छन्। -<em>बीबीसी</em>बाट</p>
प्रतिक्रिया दिनुहोस्
.jpg)
