कञ्चनपुरका पत्रिका बन्द गर्न पत्रकार महासंघ कञ्चनपुरको आह्वान
<p>कञ्चनपुर। नेपाल पत्रकार महासंघ कञ्चनपुरले जिल्लाका पत्रिका बन्द गर्न आग्रह गरेको छ।</p>
<p>कोभिड-१९ को विश्वव्यापी महामारीबाट बच्न पत्रिका बन्द गरेर सेल्फ क्वारेन्टाइनमा बस्न महासंघले अनुरोध गरेको हो। </p>
<p>पत्रकार महासंघ कञ्चनपुरका अध्यक्ष विष्णु अवस्थीले एक विज्ञप्ति जारी गर्दै पत्रिका बन्द गरेर पत्रकार तथा छापामा काम गर्ने सम्पूर्णलाई महामारीको प्रभाव नरोकिएसम्मका लागि सेल्फ क्वारेन्टाइनमा बस्न अनुरोध गरेका हुन्।</p>
<p>घरबाटै सामाजिक सञ्जाल तथा अनलाइनमार्फत् समाचार सम्प्रेषण गर्न अनुरोध गरिएको छ। त्यस्तै रेडियो तथा रेडियो पत्रकारलाई समेत सावधानी अपनाएर मात्र काम गर्न अनुरोध गरिएको छ।</p>
<p>विज्ञप्तिमा भनिएकाे छ, “माइक्रोफोनमा बोल्दा थुकका छिटाहरू माइक्रोफोनमा पर्ने र सोही माइक्रोफोन आफूतिर फर्काएर बोल्दा अन्तर्वार्ता लिने पत्रकार पनि जोखिममा पर्न सक्ने भएकाले भीडभाड नगरी सकेसम्म टेलिफोनबाटै सूचना लिई समाचार सम्प्रेषण गर्न रेडियोकर्मी पत्रकारहरूलगायत सबै पत्रकार साथीहरूलाई अनुरोध छ।”</p>
<p>कञ्चनपुरमा अहिले १८ वटा पत्रपत्रिका प्रकाशनमा छन्। प्रेस काउन्सिलको वर्गीकरणका लागि न्यूनतम ३०० अंक पुर्‍याउनुपर्ने हुन्छ।</p>
<p>कोभिड-१९ को महामारीका बेला पत्रिका बन्द गर्दा त्यो मापदण्ड पूरा नहुन सक्छ। त्यसका लागि महासंघले पहल गर्ने अध्यक्ष अवस्थीको भनाइ छ।</p>
प्रतिक्रिया दिनुहोस्
.jpg)
