किसानलाई परिचयपत्र बाँड्ने तयारी
<p>काठमाडौं। सरकारले किसानलाई परिचयपत्र दिने तयारी थालेको छ। परिचयपत्रको आधारमा अनुदान, बीउबिजन र सुविधा वितरण गर्ने गरी सरकारले तयारी थालेको हो। </p>
<p>अनुदानको मल तथा बीउबिजनमा विचौलिया हावी भएपछि परिचयपत्र बनाउने र त्यसमार्फत व्यवस्थित गर्ने कामका लागि कृषि तथा पशुपन्छी विकास मन्त्रालयले गृहकार्य गरिरहेको आजको कान्तिपुरमा छापिएको छ।</p>
<p>मन्त्रालयका प्रवक्ता तेजबहादुर सुवेदीका अनुसार यो कार्यक्रमको सुरु चरणमा ७ वटा प्रदेशको ७ जिल्लाका लागि २१ करोड बजेट प्रस्ताव गरिएको छ । त्यसपश्चात क्रमशः बढाउँदै अन्य जिल्लामा पनि वितरण गरिने सुवेदीले बताएका छन्।</p>
<p> “किसान परिचयपत्रका लागि कार्यविधि बन्ने क्रममा छ, किसान आयोग वा मन्त्रालय स्वयंकै माहतमा राख्ने भने टुंगो लागेको छैन,” उनले भने। </p>
<p>मन्त्रालयका अनुसार परिचयपत्रमार्फत मल बीउसँगै किसानलाई सहुलियत दरमा ऋण उपलब्ध गराइनेछ। </p>
<p>हाल सरकारले गरिब घरपरिवार पहिचान गरिरहेको छ। न्यून आय भएका गरिब परिवार पहिचान कार्यक्रम २०६९ मा सुरु भएको थियो। </p>
<p>पहिलो चरणमा २५५ जिल्लामा ३ लाख ९१ हजार ८३१ गरिब परिवार पहिचान भएको थियो। </p>
प्रतिक्रिया दिनुहोस्
.jpg)
