घोडेजात्रामा कोभिड-१९ प्रभाव, सांकेतिक रूपमा मात्र मनाइँदै
<p>काठमाडौं। प्रत्येक वर्ष चैत कृष्ण औँसीका दिन मनाइने घोडेजात्रा पर्व यस वर्ष सांकेतिक रूपमा मनाईँदैछ।</p>
<p>कोरोना भाइरसको संक्रमण फैलिन नदिन सरकारले आजदेखि लकडाउन घोषणा गरेकोले घोडेजात्रा प्रभावित भएको हो।</p>
<p>नेपाली सेनाले काठमाडौंको टुँडिखेलमा अश्वकला, मोटरसाइकल खेल, शारीरिक व्यायाम, युद्धकलालगायत प्रदर्शन गर्दै आएको छ। </p>
<p>आजकै दिन ललितपुरमा पनि एउटा कानो घोडा दौडाएर घोडेजात्रा मनाउने परम्परा छ ।</p>
<p>यस वर्ष कोरोना भाइरस सङ्क्रमणको सम्भावित जोखिमका कारण सेनाले विशिष्ट व्यक्तिलाई अतिथिका रूपमा बोलाएको छैन।</p>
<p>विगत वर्षमा भन्दा कम प्रदर्शन गरी घोडेजात्रा मनाउने तयारी गरिएको नेपाली सेनाका प्रवक्ता सहायक रथी विज्ञानदेव पाण्डेले जानकारी दिए।</p>
<p>“विगत वर्षमा २४ वटासम्म खेल प्रदर्शन गरिन्थ्यो, यस वर्ष घटाएर १५ वटा गरिँदैछ, सेनाभित्र पनि सबैलाई टुँडिखेलमा आमन्त्रण गरिएको छैन, स्याटलाइटबाट ब्यारेकमा देखाउने व्यवस्था मिलाएका छौँ”, उनले भने। <em>रासस</em></p>
प्रतिक्रिया दिनुहोस्
.jpg)
