गृह मन्त्रालयले भन्यो- ‘नेपाल-भारत सीमामा अलपत्र नेपालीलाई घर फर्काउनेबारे चाँडै निर्णय हुनेछ’
<p>काठमाडौं। लकडाउनसँगै नेपाल-भारत सीमामा अलपत्र नेपालीहरूलाई घर फर्काउनेबारे चाँडै निर्णय हुने गृह मन्त्रालयले जनाएको छ।</p>
<p>गृह प्रवक्ता केदारनाथ शर्माले सम्बन्धित जिल्लाका प्रमुख जिल्ला अधिकारीको रिपोर्टिङका आधारमा यसबारे मन्त्रालयले निर्णय लिने बताएका छन्। </p>
<p>देखापढीसँग कुरा गर्दै प्रवक्ता शर्माले निर्णय नभइ आफूले केही भन्न नसक्ने प्रष्ट्याएका छन्।</p>
<p>“प्रमुख जिल्ला अधिकारीहरुले त्यहाँको अवस्थाका बारेमा जानकारी दिनुहोला”, उनले भने, “अलपत्र पार्ने अवस्था आउन दिइदैन्, मन्त्रालयले दिउँसोसम्म केही निर्णय गर्ला।”</p>
<p>उनले सम्बन्धित जिल्लाका सुरक्षा अधिकारीहरुले अलपत्र परेका नेपाली हुन वा होइन प्रष्ट हेर्नुपर्ने बताए।</p>
<p>गएरातिसम्म सीमामा कोही नेपाली अलपत्र नभए पनि आजको अवस्थाका बारेमा औपचारिक रूपमा जानकारी नभएको शर्माको भनाइ छ।</p>
<p>राति ११ बजेसम्म पनि बैठक गरेर अलपत्र परेकाहरुलाई हेल्थ डेस्कमा स्वास्थ्य जाँच गराएर सेल्फ क्वारेन्टाइनमा बस्न भन्दै आउन दिइएको उनले बताए।</p>
<p>सरकारले कोभिड-१९ को जोखिमबाट बच्न हिजो, १० चैत बिहान १० बजेदेखि भारत र चीनसँग जोडिएका नाकाहरु बन्द गर्ने निर्णय गरेको थियो।</p>
<p>भारतबाट घर फर्कने नेपालीहरू नाका बन्द हुँदा दशगजा क्षेत्रमा अलपत्र परेका छन्। नेपालीहरु आउने क्रम रोकिएको छैन।</p>
<p>घर फर्किएका नेपाली जबर्जस्ती प्रवेश गर्न खोजेपछि कैलालीको भारतसँगको सीमाको <a href="https://dekhapadhi.com/news/9020" target="_blank">गौरीफन्टा नाका तनावग्रस्त</a> बनेको छ।</p>
<p>नाकामा अलपत्र परेका नेपालीहरुलाई सुरक्षाकर्मीहरुले रोक्ने प्रयास गरिरहेका छन्।</p>
<p>गौरिफन्टा नाकामा गएरातिदेखि चार सयभन्दा बढी नेपाली अलपत्र छन्।</p>
<p>त्यस्तै कंचनपुरको गड्डाचौकीस्थित ७ नम्बर पिल्लरमासमेत ५६ जना रोकिएका छन्।</p>
<p>यता भारतसँग सीमा जोडिएको पूर्वी झापाको काँकडभिट्टा नाकामा पनि घर फर्कने नेपालीहरूको लर्को लागेको छ।</p>
<p>हिजो प्रदेश १ का मुख्यमन्त्री शेरधन राईले मेचीनगर क्षेत्रको स्थलगत निरीक्षण गरी नाकामा अलपत्र परेकाहरूलाई घर फर्काउन केन्द्र सरकारसँग पहल गर्ने आश्वासन दिएका थिए।</p>
प्रतिक्रिया दिनुहोस्
.jpg)
