स्याङ्जामा विदेशबाट फर्किएका २१ जना क्वारेन्टाइनमा
<p>वालिङ। स्याङ्जाको वालिङ नगरपालिकामा विदेशबाट फर्किएका २१ जना होम क्वारेन्टाइनमा बसेका छन्।</p>
<p>विश्‍वव्यापी महामारी बनेको कोभिड-१९ को सम्भावित जोखिमलाई ध्यान दिँदै नगर क्षेत्रभित्रका विभिन्न वडाका घर/घरमा पुगेर विदेशबाट आएकालाई नगरपालिकाले होम क्वारेन्टाइनमा बस्न भनिएको हो।</p>
<p>“नगरभित्रका १४ वटै वडामा विदेशबाट फर्किएका व्यक्तिहरुको तथ्यांक संकलन गरिरहेका छौँ”, नगर प्रमुख दिलीपप्रताप खाँणले भने, “विदेशबाट फर्किएका व्यक्तिहरुलाई होम क्वारेन्टाइनमा बस्न सुझावसहित निगरानी तथा अनुगमन थालिएको हो।”</p>
<p>होम क्वारेन्टाइनमा बसेकालाई १४ दिनसम्म दैनिक आफ्नो तापक्रम नाप्न थर्मोमिटर दिइएको छ।</p>
<p>विदेशबाट आफ्नो टोलमा आएका व्यक्तिबारे नगरपालिका वा वडा कार्यालयमा खबर गरी सहयोग गर्न अनुरोध गरिएको छ।</p>
<p>१०-११ चैतमा सबै वडाको घरघरमा पुगेर सबै नागरिकलाई आफू सुरक्षित हुँदै घरपरिवारलाई पनि सुरक्षित राख्‍न सावधानी अपनाउन भनिएको स्वास्थ्य शाखा प्रमुख कमलप्रसाद पाण्डेले जानकारी दिए। <em>रासस</em></p>
प्रतिक्रिया दिनुहोस्
.jpg)
