जहाज बन्द हुँदा सुदूरपश्चिमका कोभिड-१९ को आशंका गरिएकाको नमूना परीक्षण रोकियो
<p>कैलाली। लकडाउनका कारण हवाई सेवा बन्द हुँदा सुदूरपश्चिम प्रदेशमा कोरोना भाइरस संक्रमणको आशंका गरिएका व्यक्तिको नमूना परीक्षणको लागि काठमाण्डौं पठाउन सकिएको छैन।</p>
<p>कोभिड-१९ को परीक्षणका लागि सुदूरपश्चिममा प्रयोगशाला छैन।</p>
<p>कोरोना भाइरस संक्रमणको आशंका गरिएका व्यक्तिको नमूना परीक्षणका लागि सेती प्रादेशिक अस्पतालले सुदूरपश्चिम प्रदेश जनस्वास्थ्य प्रयोगशालालाई पठाउने गरेको थियो ।</p>
<p>प्रदेश जनस्वास्थ्य प्रयोगशालाले ती नमूना संकलन गरी जहाजबाट काठमाण्डौंको टेकुस्थित राष्ट्रिय जनस्वास्थ्य प्रयोगशालामा पठाउँथ्यो।</p>
<p><img alt="" height="540" src="https://www.dekhapadhi.com/storage/photos/shares/Health/corona.00_02_18_10.Still003.jpg" width="960" /></p>
<p>यसरी धनगढीबाट काठमाण्डौं नमूना पठाउँदा त्यसको रिपोर्ट आउन तीन दिन लाग्ने गरेको थियो ।</p>
<p>तर, लकडाउनका कारण मंगलबारदेखि हवाई सेवा समेत बन्द भएकाले आशंकित बिरामीको नमूना परीक्षणका लागि पठाउन नसकिएको प्रदेश जनस्वास्थ्य प्रयोगशालाकी निमित्त निर्देशक अस्मिता सापकोटाले जानकारी दिइन्।</p>
<p>हालसम्म सेती प्रादेशिक अस्पतालबाट कोभिड-१९ को लागि प्राप्त १४ जना व्यक्तिको नमूना परीक्षण गरिएकोमा सबैको रिपोर्ट नेगेटिभ आएको सापकोटाले बताइन्।</p>
<p>सुदूरपश्चिम प्रदेश सरकारले परीक्षणका लागि नमूना काठमाण्डौं पठाउन लागि हेलिकप्टर प्रयोग गर्ने विषयमा पनि छलफल गरिरहेको छ।</p>
प्रतिक्रिया दिनुहोस्
.jpg)
