स्वास्थ्य मन्त्रालयले विभिन्न अस्पतालमा पठायाे कोभिड-१९ रोकथामका आवश्यक सामग्री
<p>काठमाडाैं। स्वास्थ्य तथा जनसंख्या मन्त्रालयले कोभिड-१९ को रोकथाम र नियन्त्रणका लागि विभिन्न अस्पतालमा सामग्री पठाएको छ।</p>
<p>स्वास्थ्यमन्त्री भानुभक्त ढकालका सल्लाहकार डा. खेम कार्कीले रोकथामका लागि अस्पतालमा दुई लाख २७ हजार २०१ आवश्यक सामग्री पठाइएको जानकारी दिए।</p>
<p>तीमध्ये मास्क दुई लाख २२ हजार ७६० र अन्य विभिन्न सामग्री चार हजार ४४१ छन्। उनका अनुसार व्यक्तिगत सुरक्षा सामग्री (पीपीई) ६२५ मध्ये २६७ पठाइएको र ३५८ मौज्दात राखिएको छ।</p>
<p>अहिले कोभिड-१९ को उपचारमा संलग्न चिकित्सकले पीपीई लगाउनुपर्ने हुन्छ। यसैगरी ४८३ गाउन, मुखमा लगाउने मास्क ५२२, स्यानिटाइजर २०९, पञ्जा एक हजार २३६, एन-९५ मास्क ६०१, चस्मा ४७१, आईआर थर्मोमिटर ५८, पीपीई ग्राउण्ड २८५, सुकभर ४७६ र फेस सिल्ड १०० वटा विभिन्न अस्पतालमा पठाइएको छ।</p>
<p>त्यस्तै खरिद गरिएकामध्ये दुई लाख ७९ हजार ३८७ सामग्री तत्काल नपठाई मौज्दातसमेत गरिएको छ। तीमध्ये मास्क दुई लाख ७२ हजार ४२० र अन्य सामग्री ६ हजार ९६७ रहेका छन्। जसअनुसार पीपीई ३५८, गाउन एक हजार ४५६, फेस मास्क एक हजार ५७८, स्यानिटाइजर ७७, पञ्जा एक हजार ५९३, एन-९५ मास्क २४, चस्मा ४८०, आईआर थर्मोमिटर चार, सुकभर एक हजार १६२ र फेस सिल्ड २३५ मौज्दात राखिएको छ। मौज्दात राखिएका सामग्री आवश्कताअनुसार पठाइने डा. कार्कीकाे भनाइ छ। <em>रासस</em></p>
प्रतिक्रिया दिनुहोस्
.jpg)
