लकडाउन उल्लंघन गर्ने सोच्दै हुनुहुन्छ भने सचेत हुनुस्, आजदेखि संक्रामक रोग ऐन २०२० अन्तर्गत् कारबाहीमा पर्नुहोला
<p>काठमाडौं। सरकारले ११ चैत देखि कोरोना भाइरस (कोभिड १९) को संक्रमणबाट जोगिन गरेको लकडाउनको निर्णय उल्लंघन गर्नेविरुद्ध आजदेखि महानगरीय ट्राफिक प्रहरी महाशाखाले संक्रामक रोग ऐन २०२० अन्तर्गत कारबाही थालेको छ।</p>
<p>महाशाखा प्रमुख एसएसपी भीम ढकालले आजदेखि लकडाउन उल्लंघन गरेर सञ्चालन हुने सवारी साधनलाई ऐन अन्तर्गत कारबाही गरिने जानकारी दिए।</p>
<p>“दुई दिन उपत्यकामा सर्वसाधारणले उल्लंघन गरेपछि हामीले आजदेखि ऐन अन्तर्गत कारबाही थाल्ने निर्णय गरेका हौं,” उनले देखापढीसँग भने, “आजदेखि हामीले ऐनमा टेकेर उल्लंघन गर्नेविरुद्ध कडा रुपमा प्रस्तुत हुन्छौं।” </p>
<p>उपत्यकामा पहिलो दिन सवारी सञ्चालन गर्नेलाई प्रहरीले सम्झाइबुझाइ यथास्थानबाट घर फर्काएको थियो भने हिजो सवारी साधन नियन्त्रणमा लिएर दिनभर होल्ड गरेर राखेको थियो।</p>
<p>संक्रामक रोग ऐन २०२० अन्तर्गत १ महिना कैद र १ सय रुपैयाँसम्म जरिवाना हुन्छ। निर्णय कार्यान्वयनका क्रममा खटिने कर्मचारीलाई काममा बाधा गरेमा ६ महिना कैद र ६ सय रुपैयाँसम्म जरिवाना हुने कानूनी व्यवस्था छ।</p>
<p>“सर्वसाधारणले अटेरी गरेर निर्णय कार्यान्वयनमा समस्या गरे स्थानीय प्रशासन ऐन पनि आकर्षित हुने गरी कारबाही हुन्छ,” एसएसपी ढकालले भने, “हाम्रो अनुरोध भनेकै अनुमति पाएका सवारी साधन र अत्यावश्यक वस्तु ढुवानी गर्ने सवारी वाहेककाले सञ्चालन नगर्नुस् भन्ने हो।”</p>
<p>लकडाउनको उल्लंघन सबैभन्दा धेरै दुई पाङ्ग्रे सवारी अर्थात मोटरसाइकल र स्कुटर रहेका छन्। हिजो मात्रै उपत्यका क्षेत्रमा एकहजार ६३ सवारी साधन ट्राफिक प्रहरीले नियन्त्रणमा लिएर साँझ छोडेको थियो। देशैभरमा हिजो दुईहजार ४३२ सवारी साधन नियन्त्रणमा लिइएको थियो। </p>
<p>उपत्यकाका प्रमुख स्थानहरूमा महाशाखाले चेकप्वाइन्ट राखेर छ भने विभिनन चोकमा प्रहरी खटाएको छ। आज बिहानैदेखि अहिलेसम्म १३७ वटा सवारीसाधन नियन्त्रणमा लिएर होल्ड गरिएको छ।</p>
प्रतिक्रिया दिनुहोस्
.jpg)
