सी-मोदी भेटमा उठेन कश्मिर मुद्दा, जनस्तरको सम्बन्धमा जोड
<p>काठमाडौं। भारतीय प्रधानमन्त्री नरेन्द्र मोदीसँग दोस्रो अनौपचारिक भेटपछि चिनियाँ राष्ट्रपति सी चिनफिङ नेपालका लागि चेन्नइबाट उडिसकेका छन्।</p>
<p>२४ असोज शुक्रबार भारतको चेन्नइ पुगेका सीलाई भारतीय प्रधानमन्त्री मोदीले स्वागत गरेका थिए।</p>
<p>तामिलनाडुको स्थानीय पोशाकमा सजिएका मोदीले सीलाई त्यहाँका धार्मिक र सांस्कृतिक स्थानहरू घुमाउन पनि लगेका थिए। शुक्रबार साँझ नै मोदी र सी बीच ‘वन अन वन’ वार्ता भएको थियो। </p>
<p>दुईजना दोभाषेको सहयोगमा भएको त्यो वार्ता साढे दुई घण्टा चलेको थियो। </p>
<p>"दुई नेताबीचको वार्ता निकै खुला र हार्दिक थियो", शुक्रबार साँझ भारतीय विदेश सचिव विजय गोख्लेले पत्रकार सम्मेलनमा जनाएका थिए।</p>
<p>‘ताज फिसरम्यान्स कोभ रिसोर्ट’को मचानमा पुनः सी र मोदीबीच पाँच घण्टाभन्दा बढी ‘वन-अन-वन’ बैठक भएको थियो। </p>
<p>"बुहान वार्ताले हामीलाई नयाँ गति र विश्वास दिएको थियो। आज ‘चेन्नई कनेक्ट’ मार्फत् सहकार्यको नयाँ युग शुरू भएको छ", वन-अन-वन वार्तापछि भएको प्रतिनिधी मण्डल तहको वार्तामा प्रधानमन्त्री मोदीले भने।</p>
<p>सीले चेन्नई छोडेलगत्तै भारतीय विदेश सचिव गोख्लेले सी र मोदीबीच कश्मिर मुद्दाबारे कुनै पनि चर्चा नभएको जनाएका छन्। उनले आतंकवादका कारण विश्वमै सिर्जित खतराबारे भने चर्चा भएको उल्लेख गरेका छन्।</p>
<p>‘कश्मिरबारे हाम्रो अडान स्पष्ट छ, यो भारतको आन्तरिक मामिला हो’, गोख्लेलाई उद्धृत गर्दै भारतीय सञ्चारमाध्यमहरूले लेखेका छन्।</p>
<p>गोख्लेका अनुसार राष्ट्रपति सी र प्रधानमन्त्री मोदी दुवैले जनस्तरको सम्बन्धमा जोड दिए। </p>
<p>"दुवै देशका जनताबीच सम्बन्ध विस्तार गर्ने निर्णय भएको छ", गोख्लेले जनाएका छन्।</p>
<p>सी-मोदी वार्ताबारे पत्रकार सम्मेलनमा गोख्लेले भने- "व्यापार विस्तार गर्ने सम्बन्धमा छलफल भएको छ।"<br />
</p>
प्रतिक्रिया दिनुहोस्
.jpg)
