अत्यावश्यक वस्तुको आपूर्तिका लागि आजदेखि काठमाडौंमा घुम्ती पसल
<p>काठमाडौं। लकडाउनको बेला नागरिकलाई अत्यावश्यक वस्तुको आपूर्ति सहज बनाउन आजदेखि काठमाडौं उपत्यकामा घुम्ती पसल शुरू गरिँदै छ।</p>
<p>निजी डिपार्टमेन्टल स्टोरसँगको सहकार्यमा सरकारले २४ वटा मोबाइल पसल शुरू गर्न लागेको हो।</p>
<p>उद्योग, वाणिज्य तथा आपूर्ति मन्त्रालयले दुई सरकारी कम्पनी (साल्ट ट्रेडिङ र खाद्य व्यवस्था तथा व्यापार कम्पनी) र उपत्यकामा सञ्चालित निजी डिपार्टमेन्टल स्टोरहरूलाई मोबाइल भ्यानमार्फत घुम्ती पसल सञ्चालन गर्न निर्देशन दिइसकेको छ।</p>
<p>आपुर्तिमन्त्री लेखराज भट्टले उपत्यकामा दुई दर्जन घुम्ती पसल सञ्चालन गर्न निर्देशन दिएका हुन्।</p>
<p>मन्त्रालयका अनुसार साल्ट ट्रेडिङ कर्पोरेशनले ४ वटा र खाद्य व्यवस्था तथा व्यापार कम्पनीले दुई वटा घुम्ती पसल सञ्चालन गर्नेछन्।</p>
<p>१८ वटा घुम्ती पसल भने निजी क्षेत्रबाट सञ्चालन हुनेछ।</p>
<p>आजैदेखि खाद्यान्न र अत्यावश्यक वस्तु राखेर उपत्यकामा घुम्ती पसल शुरू गर्ने तयारी रहेको आपुर्ति मन्त्रालयकी सहप्रवक्ता उर्मिला केसीले बताइन्।</p>
<p>कम्पनीहरुले ग्राहकको मागअनुसार धेरै वस्ती भएका ठाँउहरुमा मोबाइल भ्यानमार्फत अत्यावश्यक वस्तुहरू विक्रीका लागि पुर्‍याउने छन्।</p>
<p>साल्ट ट्रेडिङले लकडाउनपछि काठमाडौं उपत्यका, भक्तपुर र काभ्रेमा गरी छ वटा पसल संचालन गरिरहेको छ।</p>
<p>बनेपा, भक्तपुर, कोटेश्वर, सतुङ्गल, कालिमाटी र जावलाखेलमा नयाँ पसल राखिएका छन्।</p>
<p>घुम्ती पसलमा खाद्यान्न, तरकारी, फलफूल, माछामासु, दूध तथा दूधजन्य पदार्थ, पानी, सरसफाई सामाग्री, चिनी, तेल जस्ता वस्तु बिक्री गरिनेछ।</p>
प्रतिक्रिया दिनुहोस्
.jpg)
