अत्यावश्यक सामग्रीको ‘होम डेलिभरी’ र घुम्ती पसल शुरू
<p>काठमाडौं। दैनिक उपभोग्य वस्तु बिक्री गर्न मोबाइल भ्यानमार्फत् घुम्ती पसल र होम डेलिभरी शुरू गरिएको छ। साल्ट ट्रेडिङ कर्पोरेसनले आजदेखि उपत्यकामा दुईवटा भ्यानमार्फत् घुम्ती पसल शुरू गरेको हो।</p>
<p>कर्पोरेसनले काठमाडौं उपत्यकाको बानेश्वर, बबरमहल र अनामनगरमा यस्तो सेवा शुरू गरेको प्रमुख कार्यकारी अधिकृत उर्मिला श्रेष्ठले बताइन। यस्तै, कर्पोरेसनको अर्को भ्यानले ललितपुरको पाटन, पुल्चोक, लगनखेल र जावलाखेलमा भ्यानमार्फत् घुम्ती पसल सञ्चालनमा ल्याएको छ। </p>
<p>कर्पोरेसनले आवश्यक्ता अनुसार अरु घुम्ती पसल सञ्चालन गर्न अन्य दुईवटा भ्यान तयारी अवस्थामा राखेको बताएको छ। हाल दिउँसो १२ देखि ३ बजेसम्म सञ्चालन हुँदै आएको घुम्ती पसल बिहान ९ बजेदेखिनै सञ्चालनमा ल्याउने तयारी छ।</p>
<p>कर्पोरेसनको घुम्ती पसल प्रत्येक टोलमा सञ्चलान ल्याइने बताइएको छ। त्यसका लागि खाद्यान्न नपाइएका टोलका नागरिकले कर्पोरेसनको नम्बर ०१४२७१०१४ मा फोन गर्नु पर्ने हुन्छ।</p>
<p>त्यसैगरी, नेपालको सबैभन्दा ठूलो डिपार्टमेन्टल स्टोर भाट भटेटीले पनि आजदेखि भ्यानमार्फत् दैनिक उपभोग्य वस्तु घरमै पुर्‍याउन शुरू गरेको छ। कम्पनीले आज पोखरामा भ्यानमार्फत् होम डेलिभरी गरेको छ। ग्राहकको अर्डरअनुसार घरघरमा सामान पुर्‍याउन लागिएको कम्पनीले जानकारी दिएको छ।</p>
<p>यसका साथै कम्पनीले आफ्नो शाखा कार्यलय रहेका अन्य शहरमा पनि भ्यानमार्फत् सेवा दिन बताएको छ। कम्पनीका सञ्चालक मिनबहादुर गुरुङले आफ्नो व्यावसायिक उत्तरदायित्व अन्तरगत् होम डेलिभरी सेवा शुरू गरेको बताए। </p>
<blockquote>
<p>खाद्य व्यवस्था तथा व्यापार कम्पनीले समेत भ्यानमार्फत सेवा शुरू गर्न एउटा भ्यान तयारी अवस्थामा राखेको छ।</p>
</blockquote>
<p>“लकडाउनको समयमा सरकारले ग्राहकको घर घरमा दैनिक उपभोग्य सामग्री पुर्‍याउन अनुरोध गरेकाले यस्तो सेवा शुरू गरेका हौँ”, उनले भने। ग्राहकले भाटभटेनीको भ्यानमार्फत दैनिक उपभोग्य वस्तु घर घरमै बोलाउन कम्पनीको ल्यान्डलाइन नम्बर ०१४४१३८२५ मा फोन गर्नु पर्नेछ।</p>
<p>ग्राहकले इन्टाग्राम अकाउन्ट र फेसबुक अकाउन्टमा आफूलाई चाहिने वस्तु र फोन नम्बर र स्थान राखेपछि त्याही पुर्‍याइने भाटभटेनी जनाएको छ।</p>
<p>यस्का साथै, सरकारी मातहतको कम्पनी खाद्य व्यवस्था तथा व्यापार कम्पनीले समेत भ्यानमार्फत सेवा शुरू गर्न एउटा भ्यान तयारी अवस्थामा राखेको छ। कम्पनीका निर्देशक नेत्रप्रसाद सुवेदीले ग्राहकको अर्डरअनुसार सामग्री घरमै पुर्‍याउन एउटा भ्यान तयारी अवस्थामा राखिएको बताए।</p>
<p>त्यस्का लागि ग्राहकले कम्पनीको भ्यान चालकको ९८४६०५३१३५ नम्बरमा फोन गर्न सक्ने छन। तर, एउटा ग्राहकले एक किलो चीनि किन्नका लागि फोन गर्दैमा भ्यान घरसम्म नजाने कम्पनीले बताएको छ।</p>
<p>कम्तीमा एउटा टोलका ग्राहकहरूले आफूलाई आवश्यक पर्ने सामग्री एकै पटक मगाउनु पर्ने छ। उपत्यकामा सञ्चालित डिपार्टमेन्टल स्टोरहरूलाई गृहमन्त्रालयले दैनिक उपभोग्य वस्तु ग्राहकको घर घरमा पुर्‍याउन १३ चैतमा निर्देशन दिएको थियो।</p>
<p style="text-align:center"><img alt="" height="1038" src="https://www.dekhapadhi.com/storage/photos/shares/Economy/Home-Delivary.png" width="960" /></p>
<p>बैठकमा उपत्यकाका भाटभटेनी, सेल्सबेरी र बिगमार्ट जस्ता ठूला डिपार्टमेन्टल स्टोरका सञ्चालक समेत उपस्थित थिए। गृहसचिव महेश्वर न्यैपानेले अन्य डिपार्टमेन्टल स्टोरहरूले पनि सेवा शुरू गर्न लागेको बताए।</p>
<p>“हामीले हिजो बिक्रेतालाई मन्त्रालयमा बोलाएर निर्देशन दिएका थियौं। सोहीअनुसार कम्पनीहरूले आफ्ना ग्राहकलाई सेवा दिन शुरू गर्नेछन्”, उनले भने। त्यसरी होम डेलिभरी गर्दा भ्यानमार्फत गर्नु पर्ने छ भने भाइरसबाट बच्नका लागि सुरक्षाको उपाय अपनाउनु पर्ने छ।</p>
<p>भ्यानमार्फत् घरघरमा सामाग्री पुर्‍याउदा समन्धित जिल्ला प्रशासनसँग सवारी चलाउने पास लिनु पर्ने छ। त्यसरी पास लिएका खाद्यान्न बोक्ने सवारीलाई प्रहरीले नरोक्ने गृहमन्त्रालयले बताएको छ।</p>
<p>भ्यानमार्फत् राखिने घुम्ती पसल तथा होम डेलिभरीमा खाद्यान्नका सामग्री, तरकारी, डेरी प्रडक्ट र औषधि लगाएतका वस्तु हुने बताइएको छ।</p>
प्रतिक्रिया दिनुहोस्
.jpg)
