एम्बुलेन्स चालकद्वारा कोरोना संक्रमितका परिवारलाई बोक्न अस्वीकार
<p>कैलाली। कुनै पनि एम्बुलेन्स चालकले कोरोना भाइरसबाट संक्रमित व्यक्त्तिका परिवारलाई बोक्न नमान्दा प्रहरी मध्यराति रित्तै फर्किएको छ।</p>
<p>कोरोनको आशंकामा सेती प्रादेशिक अस्पतालको आइसोलेसनमा राखिएका व्यक्ति संक्रमित रहेको पुष्टि भएपछि शुक्रबार साँझ प्रहरी उनका परिवारजनलाई लिन धनगढी उपमहानगरपालिका ५ हसनपुरस्थित घरमा पुगेको थियो।</p>
<p>प्रहरी संक्रमितका परिवारका सबै सदस्यलाई सेती प्रादेशिक अस्पतालको आइसोलेसनमा राख्न लिन गएको थियो। स्रोतका अनुसार संक्रमितका परिवारका सदस्य रहेको थाहा पाएपछि कुनै पनि एम्बुलन्स चालक उनीहरुलाई ल्याउन तयार भएनन्।</p>
<p>प्रहरीले मध्यरातिसम्म एम्बुलेन्स चालकहरूलाई उनीहरूलाई ल्याइदिन अनुनय विनय गरेको थियो। तर प्रहरीको आग्रह कुनै चालकले मानेनन्। त्यसपछि प्रहरी टोली मध्यराति फर्केको थियो।</p>
<p>चालकहरूले सुरक्षा कवच नभएको बताउँदै एम्बुलेन्स चलाउन नमानेका हुन्। संक्रमित सेती प्रादेशिक अस्पतालमा छन्। घरमा उनका बुवा-आमा, दाजु-भाउजु, भतिजी, पत्नी र छोरीसहित आठ जना छन्।</p>
<p>एम्बुलेन्स चालकले नमानेपछि प्रहरीले उनीहरूलाई पैदल अस्पताल ल्याउने कोशिस गरेको थियो। तर परिवारका सदस्यले मानेनन्। त्यसपछि उनीहरूलाई घरमै क्‍वारेन्टाइनमा बस्‍न आग्रह गरेर प्रहरी फर्केको छ।</p>
प्रतिक्रिया दिनुहोस्
.jpg)
