मेडिकल सामग्री लिन नेपाल एअरलाइन्सको वाइडबडी चीन जाँदै
<p>काठमाडौं। कोभिड-१९ को उपचार तथा परीक्षणमा प्रयो हुने मेडिकल सामग्री लिन राष्ट्रिय ध्वजावाहक नेपाल वायु सेवा निगम (नेपाल एअरलाइन्स) को वाइडबडी जहाज आज मध्यान्ह चीन जाँदैछ।</p>
<p>चीनबाट ल्याउने मेडिकल सामग्री करीब ३० टन रहेको बताइएको छ।</p>
<p>जहाजमा कोभिड-१९ परीक्षण गर्ने किट र पिपीइलगायतका औषधिजन्य सामग्री ल्याइनेछ।</p>
<p>निगमका अनुसार वाइडबडी ए-३३० जहाज त्रिभुवन अन्तर्राष्‍ट्रिय विमानस्थलबाट मध्याह्न साढे १२ बजे चीनको ग्वाङ्जाओ पठाउने तयारी छ।</p>
<p>मेडिकल कार्गो उडान भर्न निगमको वाइडबडी जहाजले नेपाल नागरिक उड्डयन प्राधिकरणबाट उडान अनुमति पाइसकेको छ ।</p>
<p>प्राधिकरणका प्रवक्ता राजकुमार क्षेत्रीले निगमको वाइडबडी जहाज ग्वाङ्जाओ पठाउने सबै प्रक्रिया पूरा भएको जानकारी दिँदै।</p>
<p>आजै राति साढे १० बजे चीनबाट मेडिकल सामग्री लिएर जहाज काठमाडौं फर्कने निगमका अपरेशन विभाग प्रमुख क्या. दिपु ज्वार्चनले बताए।</p>
<p>मेडिकल सामान लिन जाने यो कार्गो उडानमा चालक दलसहित १० प्राविधिक जनशक्ति खटिने छन्।</p>
<p>कोभिड-१९ फैलिन नदिन सरकारले आन्तरिक हवाई उडान बन्द गरेपनि उद्धार, राहतलगायतका अत्यावश्यक हवाई सेवा खुला रहेको छ। <em>रासस</em></p>
प्रतिक्रिया दिनुहोस्
.jpg)
