Others

गृहपृष्ठ

लकडाउन उल्लंघन गर्ने ३१४ जना पक्राउ, ७३ सवारी नियन्त्रणमा काठमाडौं। आज पाँचौ दिन पनि सर्वसाधारणले लकडाउन उल्लंघन गर्ने क्रम रोकिएको छैन। प्रहरीले दिनहुँ उल्लंघनकर्तालाई पक्राउ गर्ने र सवारी साधन नियन्त्रणमा लिइरहेको छ। तर पनि सर्वसाधारणले हिँडडुल गर्न छाडेका छैनन्।  आज पनि बिहानैदेखि महानगरीय प्रहरी कार्यालय रानीपोखरीअन्तर्गत उपत्यकाका तीनवटै जिल्लामा लकडाउन उल्लंघन गर्ने क्रम जारी छ। काठमाडौं प्रहरी परिसरका प्रवक्ता डीएसपी होबिन्द्र बोगटीका अनुसार बिहान साढे ९ बजेसम्ममा तीन सय १४ जना पक्राउ परेका छन्। यो आज बिहानको मात्र तथ्यांक हो । “हामीले दिनहुँ लकडाउन उल्लंघन नगर्नुस् भन्दै सम्झाउने गरिरहेका छौं,” उनले भने, “अटेर गर्ने क्रम रोकिएको छैन। त्यसैले सबैलाई पक्राउ गर्दैछौं।” पक्राउ गरिएकाहरूलाई महानगरीय प्रहरी परिसर र मातहतका वृतहरूमा राख्&zwj;ने गरिएको छ। प्रहरीले लकडाउन शुरु भएको दिनदेखि मानिस र सवारी साधन नियन्त्रणमा लिने गरे पनि मुद्दा नै चलाइसकेको छैन। साँझपख मानिस र सवारी साधन सबै छाड्ने गरेको छ।  हिजोदेखि प्रहरीले निश्&zwj;चित दुरीबाट मानिसलाई पक्राउ गर्न सकिने मेसिनको सहायतबाट पक्राउ गर्ने क्रम शुरु गरेको छ। नजिकै गएर पक्राउ गर्दा जोखिम हुन सक्ने भन्दै प्रहरीले मेसिन प्रयोगमा ल्याएको डीएसपी बोगटीले जानकारी दिए। यस्तै, अहिले बिहान साढे ९ बजेसम्म उपत्यका क्षेत्रबाट महानगरीय ट्राफिक प्रहरी महाशाखाले ७३ वटा सवारीसाधन नियन्त्रणमा लिएको छ। महाशाखा प्रमुख एसएसपी भीम ढकालले लकडाउनको दोस्रो दिन ठूलो संख्यामा सवारी साधन नियन्त्रणमा लिएको भए पनि त्यसपछि सवारी साधन सञ्&zwj;चालनमा कमी आएको बताए।  दिनभरी सवारी साधन होल्ड गरेर साँझ मात्रै फिर्ता गरिने गरेको उनले जानकारी दिए। प्रहरीले अत्यावश्यक कामविना सडकमा ननिस्किन आह्वान गर्दै आएको छ। उपत्यका बाहिरका जिल्लाहरूमा पनि मानिस पक्राउ पर्ने र सवारी साधन नियन्त्रणमा लिने काम भइरहेको छ।