छ सयभन्दा बढी विदेशी नागरिकलाई घर लैजान कतार एअरवेजको दुई जहाज काठमाडौं आउँदै
<p>काठमाडौं। लकडाउनका कारण अलपत्र परेका ६०० सयभन्दा बढी विदेशी नागरिकलाई उद्धार गरेर 'एअरलिफ्ट' बाट घर लैजान कतार एअरवेजको दुई वटा जहाज आज काठमाडौं आउँदैछ।</p>
<p>कतारको दोहाबाट आउन लागेको ती जहाजले जर्मन, फ्रान्स, स्वीसलगायतका युरोपियन यूनियनका नागरिकलाई 'रेस्क्यू' गर्ने नागरिक उड्डयन प्राधिकरणका प्रवक्ता राजकुमार क्षेत्रीले जानकारी दिए।</p>
<p>उनीहरूलाई काठमाडौंस्थित सम्बन्धित देशका दूतावासको अनुरोधमा घर फर्काउने व्यवस्था मिलाइएको हो।</p>
<p>कोभिड-१९ फैलिन नदिन सरकारले लागू गरेको लकडाउनका कारण नेपाल घुम्न आएका पर्यटकहरू पोखरा, लुक्ला क्षेत्रबाट विभिन्न जहाजहरूले काठमाडौं उद्धार गरेर ल्याएका थिए।</p>
<p>"दुवै जहाज ३०५ सीट क्षमताका छन्। मलाई प्राप्त सूचना अनुसार दुइटै जहाजका सीटहरू फूल छन्", क्षेत्रीले देखापढीसँग भने।</p>
<p>क्यूआर-३४६५ र क्यूआर-३४६७ कलसाइन भएका ती जहाज सवा दशदेखि ११ बजेभित्र त्रिभुवन अन्तर्राष्‍ट्रिय विमानस्थलमा अवतरण गरिसक्ने छन्।</p>
<p>हिजो, १४ चैतमा पनि कतार एअरको चार्टर्ड विमानले जर्मन र युरोपेली यूनियनका नागरिकलाई उद्धार गरेको थियो।</p>
प्रतिक्रिया दिनुहोस्
.jpg)
