धनगढीका कोभिड-१९ संक्रमितको बयान- 'संक्रमित भएको थाहा पाएपछि कुनै स्वास्थ्यकर्मी हेर्न आएका छैनन्'
<p>कैलाली। सेती प्रादेशिक अस्पताल धनगढीमा उपचाररत् कोभिड-१९ संक्रमित युवाले आफ्नो अवस्था सामान्य रहेको र चाँडै निको हुनेमा आफू ढुक्क रहेको बताएका छन्।</p>
<p>आज <em>देखापढी</em>सँगको टेलिफोन कुराकानीमा उनले हिजो अपराह्न आफूलाई कोभिड-१९ को संक्रमण पुष्टि भएदेखि कोही स्वास्थ्यकर्मी भेट्न नआएको र तातो पानी पिउने व्यवस्थासमेत हुननसकेको बताए। "आज घरबाट पानी तताउँने भाँडा पठाइदिनुभएको छ", उनले भने।</p>
<p>सेती प्रादेशिक अस्पतालमा उपचाररत ३४ बर्षीय ती युवकले <em>देखापढी</em>का सुदूरपश्चिम संवाददाता <strong>दीपक नेपाल</strong>सँगको कुराकानीमा यसो भनेः</p>
<p>साढे चार बर्षअघि म वैदेशिक रोजगारका लागि युनाईटेड अरब इमिरेट्स् (युएई) को दुबई गएको थिएँ। काम राम्रैसँग चलिरहेको थियो । कम्पनीले एक महीनाको विदा दिएपछि घर फर्किने सोच बनाएँ।</p>
<p>तर, त्यहीबेला नेपालले १ चैतबाट नै खाडी मुलुक हुँदै नेपाल आउने सबै उडान बन्द गरेका कारण घर आउन नपाउने हो कि भन्ने चिन्ता पनि थियो।</p>
<p>विराटनगरका एकजना साथी पनि सँगै थिए। उनैले भारत भएर जान सकिने बताएपछि म र साथी दुबईबाट भारतको राजधानी दिल्ली हुँदै काठमाडौ आउने योजना बनायौं।</p>
<p>७ गते हामी दुबईबाट दिल्ली पुग्यौं। दिल्लीबाट काठमाडौँ उडान नियमित थियो। तर, हामीले काठमाडौं आउनका लागि ६ घण्टा पर्खिनुपर्ने भयो।</p>
<p>हामी दिल्लीको विमानस्थलबाट कतै बाहिर ननिस्की बिमानस्थलमै बस्यौं।</p>
<p>६ घण्टापछि दिल्लीबाट काठमाडौँका लागि एअर एसशयाको जहाजमा उड्यौं।</p>
<p>त्यो दिन धनगढी जान सम्भव नभएपछि धापासीमा रहेको मामाको घरमा बसें। साथी पनि आफन्तकोमा गयो।</p>
<p>अर्को दिन, ८ चैतमा धनगढीको टिकट नपाएपछि नेपालगन्ज भएर धनगढी जाने निधो गरें र म बुद्ध एअरको विमानमार्फत् नेपालगंज आएँ।</p>
<p>सोही दिन नोपलगञ्जबाट महेन्द्रनगरको सार्वजनिक बसमा चढें र अत्तरिया झरें। अनि अत्तरियाबाट अर्को सार्वजनिक गाडीमा धनगढी पुगें।</p>
<p>त्यसपछि घरपरिवार र छरछिमेकीसँग सामान्य भेटघाट भयो। घरमा बा आमा, श्रीमती, सानो छोरी, दाइभाउजु अनि भतिजी छन्।</p>
<p>११ गते स्वास्थ्यमा सामान्य समस्या देखिएपछि म आफै सेती प्रादेशिक अस्पताल धनगढीमा आएको हुँ।</p>
<p>यहाँ आएपछि डाक्टरहरुले आईसोलेसनमा बस्न सुझाए। र मेरो थ्रोट स्वाब लिएर काठमाडौ पठाए।</p>
<p>आईसोलेसनमा बसेको चौथो दिन कोरोना भाईरस पोजिटिभ भएको सुनाउँदा म आफैँ अचम्मित भएँ।</p>
<p>अहिले मलाई अस्पतालको छुट्टै कोठामा राखिएको छ। हिजोको रिपोर्टपछि अहिलेसम्म कुनै पनि स्वास्थ्यकर्मी मलाई भेट्न आउनु भएको छैन्।</p>
<p>मैले तातो पानीसमेत पिउन नपाएपछि अहिले घरबाट पानी तताउँने भाँडा पठाइदिनु भएको छ।</p>
<p>म सन्चो हुन्छ भन्ने कुरामा ढुक्क छु । अहिले मेरो अवस्था सामान्य छ।</p>
प्रतिक्रिया दिनुहोस्
.jpg)
