'लकडाउन' नेपाल : ज्यालादारी श्रमिकको लागि राहत प्याकेज ल्याउँदै प्रदेश १ सरकार
<p>विराटनगर। प्रदेश १ सरकारले कोभिड-१९ को जोखिम नियन्त्रणका लागि देशभर लागू गरेको लकडाउनका कारण छाक टार्न समस्या भएका विपन्न वर्गका व्यक्तिहरूलाई राहत प्याकेज ल्याउने भएको छ।</p>
<p>प्रदेश नं १ का मुख्यमन्त्री शेरधन राईले न्यून आय भएका दैनिक ज्यालादारीमा काम गर्ने श्रमिकहरूलाई आर्थिक प्याकेज उपलब्ध गराउने विषयमा सरोकारवालासँग छलफल गरेका छन्।</p>
<p>मुख्यमन्त्री तथा मन्त्रिपरिषद्को कार्यालय प्रांगणमा बोलाइएको सर्वपक्षीय बैठकमा खाद्यान्न तथा दैनिक उपभोग्य सामानको आपूर्ति सहज बनाउने साथै न्यून आय भएका श्रमिकहरूलाई राहत दिनेबारे छलफल भएको छ।</p>
<p>लकडाउनका कारण दैनिक रोजिरोटीमा समस्या भएकाहरूको तथ्यांक संकलन गरी उनीहरूलाई एक/दुई दिनमा राहत प्याकेज घोषणा गर्न लागिरहेको मुख्यमन्त्रीका प्रेस सल्लाहकार ध्रुव सुवेदीले बताए।</p>
<p>सर्वपक्षीय बैठकमा मुख्यमन्त्री राईले कोभिड-१९ सँग जुध्न तयारी तथा प्रतिकार्यका लागि प्रदेश सरकारले गरिरहेका काममा एकजुट भएर सहयोग गर्न आग्रह गरेका छन्। </p>
<p>प्रदेश सभामा प्रतिनिधित्व गर्ने राजनीतिक दलका नेताहरु, स्थानीय तहका जनप्रतिनिधि, अस्पतालका प्रतिनिधि, उद्योगी, व्यवसायीलगायत सहभागी थिए।</p>
प्रतिक्रिया दिनुहोस्
.jpg)
