अत्यधिक रक्तश्राव भएपछि खोटाङकी एक गर्भवतीको हेलिकप्टरबाट उद्धार
<p>काठमाडौं। खोटाङ ऐसेलुखर्क गाउँपालिका-३ की पाँच महीनाकी गर्भवती २२ वर्षीया सिर्जना तामाङको अत्यधिक रक्तश्राव भएपछि हेलिकप्टरबाट उद्धार गरिएको छ।</p>
<p>प्राथमिक स्वास्थ्य केन्द्र ऐसेलुखर्कमा ल्याइएकी उनको अत्यधिक रक्तश्राव भएर अवस्था जटिल भएपछि नेपाली सेनाको हेलिकप्टरमार्फत् उद्धार गरेर काठमाडौं ल्याइएको हो।</p>
<p>महिला, बालबालिका तथा ज्येष्ठ नागरिक मन्त्री पार्वत गुरुङको पहलमा उनको उद्धार गरिएको हो। अहिले उनको थापाथलीस्थित परोपकार प्रसूति तथा स्त्रिरोग अस्पतालमा उपचार भइरहेको छ।</p>
<p>पाँच महीनाकी ती गर्भवतीलाई हिजाे १४ चैत साँझदेखि रक्तश्राव भएको थियो। गर्भमा रहेकाे शिशु र आमा दुवैको जीवन रक्षाका लागि काठमाडाैं रिफर गर्नुपर्ने अवस्था देखिएपछि अहेव निर्मला शर्माले खोटाङका प्रतिनिधि सभा सांसद् विशाल भट्टराईलाई उनको अवस्थाबारे जानकारी दिएकी थिइन्।</p>
<p>सांसद् भट्टराईले आफूले महिला, बालबालिका तथा ज्येष्ठ नागरिक मन्त्री पार्वत गुरुङलाई स्वास्थ्य अवस्थाबारे जानकारी गराएको र त्यसपछि सेनाको हेलिकप्टरले उद्धार गरेर काठमाडौं ल्याएको आफ्नो फेसबुकमा उल्लेख गरेका छन्।</p>
<p>सरकारले दुर्गम क्षेत्रमा प्रसूति व्यथाले जोखिम अवस्था भएकाहरूलाई हेलिकप्टमार्फत् उद्धार गर्दै आएकाे छ।</p>
प्रतिक्रिया दिनुहोस्
.jpg)
