साझा पार्टीले भन्यो- ‘उच्चस्तरीय सर्वदलीय राजनीतिक संयन्त्र गठन गर’
<p>काठमाडौं। साझा पार्टीले काेभिड-१९ सँग जुध्न उच्चस्तरीय सर्वदलीय राजनीतिक संयन्त्र र विज्ञ समिति गठन गर्न सरकारसँग माग गरेको छ।</p>
<p>हालकै संरचनाभित्रको घनिभूत प्रयासको निरन्तरताले मात्रै यो संकटको सामना गर्न कठिन भएकाले यस्तो मानवीय संकटसँग जुध्न सरकारले आफ्नो कार्यशैलीमा संरचनागत फेरबदल गर्नुपर्ने साझा पार्टीले जनाएको हाे।</p>
<p>साझा पार्टी संयोजक रविन्द्र मिश्र र प्रवक्ता सूर्यराज आचार्यले आज उपप्रधानमन्त्री ईश्वर पोखरेललाई ‘प्रधानमन्त्रीलाई सुझावपत्र’ हस्तान्तरण गर्दै यस्तो बताएका हुन्।</p>
<p>प्रधानमन्त्रीलाई सम्बाेधन गरिएकाे सुझावपत्रमा प्रधानमन्त्रीको नेतृत्वमा, त्यो सम्भव नभए उपप्रधानमन्त्री ईश्वर पोखरलेको नेतृत्वमा प्रमुख दलका नेताहरू समेत रहने गरी उच्चस्तरीय राजनीतिक संयन्त्र निर्माण गर्नु अत्यावश्यक देखिएको उल्लेख छ।</p>
<p>यो संयन्त्रले राजनीतिक तहमा आएका विभिन्न विचार, राय र सुझावलाई समीक्षा र संश्लेषण गर्ने माध्यमको रूपमा पनि काम गर्ने साझा पार्टीको भनाइ छ। संकटको अवस्थामा आमजनमानसको राज्य र राजनीतिप्रतिको विश्वसनीयता कायम राख्नसमेत यस्तो संयन्त्रले सघाउ पुर्‍याउने उल्लेख गरिएको छ।</p>
<p>यस्तै साझा पार्टीले उच्च स्तरीय विज्ञ समिति निर्माणको पनि माग गरेको छ। वर्तमान संकटको विविध क्षेत्रमा पर्ने तात्कालिक र दीर्घकालिक असरहरूसँग जुध्नका लागि सरकारलाई निरन्तररूपमा आवश्यक विश्लेषण, सुझाव र समीक्षाका लागि एउटा उच्चस्तरीय विज्ञ समिति निर्माण गर्न उपयुक्त हुने साझा पार्टीले जनाएको छ।</p>
<p>उक्त समितिमा प्रशासन र स्वास्थसेवाका सम्बन्धित अधिकारीहरू लगायत देशभित्र र बाहिर रहेका नेपाली, आवश्यक परेको खण्डमा विदेशी विज्ञहरूलाई पनि सामेल गर्न सकिने साझा पार्टीको भनाइ छ।</p>
प्रतिक्रिया दिनुहोस्
.jpg)
