तनहुँमा ७१ मजदुरकाे उद्धार गरी घर पठाइयाे
<p>तनहुँ। तनहुँको व्यास नगरपालिका-२ मा अलपत्र परेका मजदुरलाई वडा कार्यालयको पहलमा आज उद्धार गरिएको छ।</p>
<p>दमौली बजारमा विभिन्न क्षेत्रमा काम गर्ने मजदुरलाई वडा कार्यालयको समन्वयमा उद्धार गरेर घर पठाइएको हो।</p>
<p>उनीहरूलाई दुईवटा बसमा गाैर र वीरगन्ज पठाइएको वडाध्यक्ष काशीराम श्रेष्ठले जानकारी दिए। श्रेष्ठका अनुसार ३६ जनालाई रौतहटकाे गौर र ३५ जनालाई वीरगञ्ज पठाइएको छ।</p>
<p>“लकडाउनका कारण काम नभएपछि दमौलीमा अलपत्र परेका उनीहरू घर जान चाहेकाले प्रशासन कार्यालयसँग समन्वय गरेर घर पठाइएको हो”, श्रेष्ठले भने, “थप मजदुरलाई भोलि पनि उद्धार गरेर पठाउँछौं।”</p>
<p>भाेलि, १६ चैतमा गौर जानका लागि २२ मजदुरको नाम सङ्कलन भइसकेको छ। “वडा नं २ मा अलपत्र परेर बसेका सबै मजदुरलाई उद्धार गरेर घरतर्फ पठाउने व्यवस्था मिलाएका छौं”, श्रेष्ठले भने। उनले वडाभित्रका विपन्न मजदुरलाई लक्षित गरी राहत प्याकेजसमेत ल्याउने तयारी गरेको जानकारी दिए। <em>रासस</em></p>
प्रतिक्रिया दिनुहोस्
.jpg)
