कोभिड-१९ सँग जुध्न विश्व बैंक, आईएमएफ र एडीबीको ऋण लिने सरकारको निर्णय
<p>काठमाडौं। आज बसेको मन्त्रिपरिषद्ले कोभिड-१९ सँग जुध्न तय गरिएका कार्यक्रमका लागि आवश्यक स्रोत व्यवस्था गर्न अन्तर्राष्ट्रिय आर्थिक सहायता स्वीकार गर्ने निर्णय गरेको छ। </p>
<p>मन्त्रिपरिषद्का निर्णयबारे जानकारी दिन आयोजित पत्रकार सम्मेलनमा सरकारका प्रवक्ता, अर्थ र सञ्चार तथा सूचना प्रविधिमन्त्री डा. युवराज खतिवडाले अन्तर्राष्ट्रिय आर्थिक सहायता परिचालन गर्नेतर्फ निर्णय भएको जानकारी दिएका हुन्।</p>
<p>जसअनुसार सरकारले विश्व बैंकबाट आपतकालीन स्वास्थ्य क्षेत्र सहयोग कार्यक्रमअन्तर्गत प्राप्त हुने तीन अर्ब ४८ करोड सहुलियतपूर्ण ऋण स्वीकार गर्न वार्ता र सम्झौता गर्ने निर्णय गरेको छ।</p>
<p>मन्त्री खतिवडाका अनुसार सरकारले अन्तर्राष्ट्रिय मुद्रा कोषबाट उपलब्ध हुने १३ अर्ब ९ करोड निर्ब्याजी ऋण सुविधा प्राप्त गर्न वार्ता र सम्झौता गर्ने निर्णय पनि गरेको छ। त्यस्तै एशियाली विकास बैंकले हालै घोषणा गरेको करीब ५० मिलियन अमेरिकी डलरको सहयोग पनि स्वीकार गर्ने निर्णय गरेको मन्त्री खतिवडाले बताए।</p>
<p>“अन्य सम्भावित विकास साझेदारबाट पनि परिचालित गर्न सक्ने स्रोतलाई परिचालन गर्ने निर्णय भएका छन्,” उनले भने।</p>
<p>साथै सरकारले स्रोतको व्यवस्थापनका लागि आन्तरिकरूपमा पनि विभिन्न योजना बनाएको छ। वार्षिक बजेटको रकमबाट रकमान्तरण गर्ने, संघ, स्थानीय तह र प्रदेशको कोरोना रोकथाम तथा नियन्त्रण उपचार कोषमा जम्मा हुने रकम परिचालन गर्ने निर्णय भएको छ।</p>
<p>त्यस्तै मन्त्रिपरिषद्ले राष्ट्रिय विपत् व्यवस्थापन कोषमा जम्मा भएको रकम र प्रधानमन्त्री दैवी प्रकोप उद्धार कोषको रकम पनि प्रयोग गर्ने निर्णय गरेको छ।</p>
प्रतिक्रिया दिनुहोस्
.jpg)
