लकडाउनमा आकस्मिक रूपमा अस्पताल जान परे के गर्ने ?
<p>काठमाडौं। कोभिड-१९ बाट जोगिन अहिले देशैभर लकडाउन गरिएको छ । अधिकांश मानिस घरबाट बाहिर निस्किएका छैनन् । तर, तपाईँको घर, टोल–छिमेक वा आफन्तमा कुनै बिरामीलाई तत्कालै अस्पताल लैजानुपर्ने अवस्था आए के गर्नुहुन्छ? पक्कै पनि तपाईंले यसबारे योजना बनाउनु भएको छैन। </p>
<p>त्यो अवस्था आएमा के गर्ने? अझ त्यस्तो बेलामा कस्तो सावधानी अपनाउने ?</p>
<p>चिकित्सकहरुका अनुसार यस्तो बेला सबै मानिसले आवश्यक सतर्कता अपनाउन जरुरी छ । कोभिड–१९ का लक्षण देखिए अपनाउनुपर्ने सावधानी त छँदैछ, दम, एपेन्डिसाइटिस, उच्च रक्तचाप र अत्यधिक पेट दुख्ने जस्ता आकस्मिक बिरामीलाई अस्पताल लैजाँदा पनि सावधानी अपनाउनुपर्ने हुन्छ ।</p>
<p>त्रिवि शिक्षण अस्पताल महाराजगञ्जमा इन्टरनल मेडिसिन विभागअन्तर्गत संक्रमण रोग हेर्ने डा. सविन थपलिया कोभिड–१९ महामारीको बेला अन्य बिरामी, आफन्त र स्वास्थ्यकर्मीले पनि आवश्यक सतर्कता अपनाउन जरुरी रहेको बताउँछन् ।</p>
<p>“कस्ता किसिमका बिरामी हुन् त्यसको पहिचान गर्नुपर्यो, कुन अस्पतालमा उपचार हुन्छ, चिकित्सक उपलब्ध छ÷छैन पत्ता लगाएर अस्पताल लैजानुपर्ने हुन्छ”, डा. थपलिया भन्छन्, “अपरेसन गर्नुपर्नेछ भने सर्जन उपलब्ध भएको अस्पतालमा जानुपर्यो ।”</p>
<p>राजधानीका अधिकांश अस्पतालमा इमर्जेन्सी खुला छ, तर ओपिडी बन्द छ । कोभिड–१९का लागि प्रायः हरेक अस्पतालमा छुट्टै हेल्थ डेस्क राखिएका छन् । </p>
<p>अहिलेको बेला जुनसुकै बिरामी भएपनि कोभिड–१९ बाट जोगिने सावधानी अपनाउनैपर्ने उनी बताउँछन् । ट्याक्सी चालक वा एम्बुलेन्सका चालकसम्मले पनि सावधानीका उपाय अपनाउनुपर्ने, उनीहरुले अनिवार्य रुपमा मास्क र ग्लोभ्स लगाउनुपर्ने चिकित्सकहरुको सुझाव छ । डा. थपलियाका अनुसार बिरामी, आफन्त, स्वास्थ्यकर्मी र चालकले अपनाउनुपर्ने सावधानी यसप्रकार छन्ः</p>
<p><strong>बिरामीले अपनाउनुपर्ने</strong></p>
<p>– अस्पतालमा पुग्दा अन्य बिरामीसँग दुरी कायम राख्ने </p>
<p>– अरु बिरामीसँग घुलमिल नहुने </p>
<p>– अनावश्यक ठाउँमा नछुने </p>
<p>– छोइहाले साबुनपानीले हात धुने वा स्यानिटाइजर प्रयोग गर्ने </p>
<p><strong>आफन्त (कुरुवा)ले अपनाउनुपर्ने</strong></p>
<p>– बिरामीको प्रकृति हेरेर सावधानी अपनाउने</p>
<p>– रुघाखोकीका बिरामी छन् भने एक मिटर (तीन फिट)को दुरी कायम गर्ने </p>
<p>– अरु बिरामीको छेउमा नजाने </p>
<p>– पटक–पटक साबुनपानीले हात धुने </p>
<p>– स्यानिटाइजर प्रयोग गर्ने </p>
<p>– मास्कको अनिवार्य प्रयोग गर्ने </p>
<p>– अरुबाट जोगिन अपनाउनुपर्ने सावधानी अपनाउने</p>
<p><strong>स्वास्थ्यकर्मीले अपनाउनुपर्ने</strong> </p>
<p>– बिरामीसँग तीन फिटको दुरी कायम गर्ने </p>
<p>– थुकका छिटा उछिट्टिएर पर्नसक्ने हुँदा मास्क लगाउने</p>
<p>– अनिवार्य पञ्जा लगाउने, फाल्ने </p>
<p>– पटक–पटक हात धुने </p>
<p>– जुनसुकै बिरामीलाई उपचार गराउँदा सावधानी अपनाउने</p>
<p><strong>चालकले अपनाउनुपर्ने</strong></p>
<p>– एम्बुलेन्स वा ट्याक्सीका सबै झ्याल खुल्ला राख्ने </p>
<p>– अनिवार्य मास्क लगाउने </p>
<p>– सकेसम्म तीन फिटको दुरी कायम राख्ने </p>
<p>– बिरामीलाई अस्पताल पुर्याइसकेपछि गाडी सफा गर्ने </p>
<p>– साबुनपानी वा स्यानिटाइजरले हात सफा गर्ने</p>
प्रतिक्रिया दिनुहोस्
.jpg)
