Others

गृहपृष्ठ

सुर्खेत पुगेर स्वास्थ्य राज्यमन्त्रीले भने- ‘कर्णालीमा कोभिड-१९ जाँच्ने मेसिन र जनशक्ति एक हप्तामै व्यवस्थापन हुन्छ’ सुर्खेत। स्वास्थ्य तथा जनसङ्ख्या राज्यमन्त्री नवराज रावतले कर्णालीमा एक साताभित्रै कोभिड–१९ को परीक्षण गर्ने ल्याब मेसिन र दक्ष जनशक्ति पठाउने बताएका छन्। चीनबाट खरीद गरी ल्याइएका मेडिकल सामग्री आज प्रदेश स्वास्थ्य आपूर्ति व्यवस्थापन केन्द्रलाई हस्तान्तरण गर्दै उनले ल्याब मेसिनको परीक्षण गरेर मात्र प्रदेशमा पठाइने बताए।      उनले मेसिन परीक्षण गर्नेवित्तिकै काठमाडौंबाट एम्बुलेन्समा पठाउने बताए। कर्णालीमा कोरोना भाइरस जाँच गर्ने मेसिन नहुँदा यहाँ आशङ्कित बिरामीको ‘थ्रोट स्वाब’ काठमाडौं पठाउनुपर्ने बाध्यता छ। राज्यमन्त्री रावतले कर्णालीका लागि आएको मेसिन अन्य प्रदेशका अस्पतालमा नजानेमा ढुक्क हुन आग्रह गर्दै भने, “कर्णालीका लागि आएको मेसिन अन्यत्र जाँदैन, यही साताभित्र दक्ष जनशक्तिसहित मेसिन आइपुग्छ।”      सरकारले चीनबाट खरीद गरी ल्याएका मेडिकल उपकरण सेनाको स्काइ ट्रकमार्फत सुर्खेत ल्याइएको थियो। सुर्खेत विमानस्थलमा राज्यमन्त्री रावतले सामाजिक विकासमन्त्री दल रावलको रोहबरमा प्रदेश स्वास्थ्य आपूर्ति व्यवस्थापन केन्द्रलाई गाउन एक हजार, एन ९५ मास्क ४८० थान, आइआर थर्मामिटर १० थान, पञ्जा २० हजार थान र सर्जिकल मास्क १० हजार थान हस्तान्तरण गरे। सामाजिक विकासमन्त्री रावलले कोरोना भाइरसको महामारी भित्रिन नदिन प्रदेश सरकारले सतर्कता अपनाइरहेको बताए।    विपद् कोषमा १२ लाख सहयोग      कर्णाली प्रदेश सरकारद्वारा कोभिड–१९ को प्रतिकार्य, रोकथाम तथा नियन्त्रणका लागि स्थापित प्रदेश विपद् व्यवस्थापन कोषमा १२ लाख ५० हजार सहयोग भएको छ। प्रदेश सरकारको उक्त कोषमा सिटीजन्स् बैंक सुर्खेतले सात लाख र नेपाल मगर समुदायद्वारा सुर्खेतमा सञ्चालित संस्थाले पाँच लाख ५० हजार सहयोग गरेका हुन्।      सिटीजन्स् बैंक शाखा सुर्खेतका प्रबन्धक प्रकाश महतले सात लाख र मगर समुदायद्वारा सञ्चालित संस्थाको तर्फबाट पाँच लाख ५० हजारको चेक कर्णाली प्रदेश सरकारका आन्तरिक मामिला तथा कानूनमन्त्री नरेश भण्डारीलाई हस्तान्तरण गरिएको छ। रासस