महीना दिनको हाजिर गरी घरमै बसे हुम्लाका स्वास्थ्यकर्मीहरू
<p>हुम्ला। कोभिड-१९ ले विश्वव्यापी प्रकोप रूप लिइरहेको बेला स्वास्थ्य संस्था नछाड्न सरकारको आदेशलाई अटेर गर्दै हुम्लाको डाडाफया स्वास्थ्यचौकीमा कार्यरत् स्वास्थ्यकर्मीहरू चैत अन्तिमसम्मको हाजिर गरी घर हिँडेका छन्।</p>
<p>सिमकोट गाउँपालिका-७ मा रहेको डाडाफया स्वास्थ्यचौकीका इन्चार्जसहित अन्य स्वास्थ्यकर्मीले कार्यालयमा पुगी यो महिनाभरी शनिबारको समेत हाजिर गरेका छन्।</p>
<p>अहिले डाडाफया स्वास्थ्यचौकीमा औषधिको नाममा सिटामोल र करारमा खटिएका एक अनमी मात्रै छन् । स्थायी दरबन्दीमा कार्यरत् स्वास्थ्यकर्मी भने स्वास्थ्य संस्था छाडेर घर हिँडेको स्थानीयवासीले बताएका छन्।</p>
<p>स्वास्थ्यचौकीमा दुई अहेब, एक स्वास्थ्यचौकी इन्चार्ज (एचए), तीन अनमी र एक कार्यालय सहयोगी गरी सात जनाको दरबन्दी रहे पनि अहिले करारमा रहेका एक अनमीले मात्रै स्वास्थ्यचौकीको सेवा धानिरहेकी छिन्।</p>
<p>८ चैतदेखि संयोजकसहित अन्य स्वास्थ्यकर्मी स्वास्थ्य संस्थामा नभएको स्थानीयवासी टसी विकले बताए।</p>
<p>सामान्य उपचारका लागि स्वास्थ्य चौकी पुगे पनि औषधि र स्वास्थ्यकर्मी अभावमा त्यत्तिकै फर्किनुपरेको स्थानीयवासी बाँचु शाहीले गुनासो गरे।</p>
<p>करारमा रहेकी अनमी संगिता रोकायाले बिहानदेखि बेलुकासम्म एक्लैले काम गर्नुपरेको बताइन्।</p>
<p>स्वास्थ्यचौकीमा बालबालिकाका लागि प्रयोग गरिने औषधि केही पनि नभएको रोकायाले बताइन्।</p>
<p>कार्यालय सहयोगीलाई औषधि ल्याउनका लागि सदरमुकाम पठाए पनि नआएको र संयोजकलाई फोन गर्दा फोन नउठाएको उनको भनाइ छ।</p>
<p>यता सिमकोट गाउँपालिका स्वास्थ्य संयोजक दानबहादुर बोहराले शनिबार हाजिर गर्न नमिल्ने र बिदामा पनि नबस्न सरकारले ह्वीप जारी गरेका बेला त्यस्तो गरेको पाइए कारबाही गरिने बताए। <em>रासस</em></p>
प्रतिक्रिया दिनुहोस्
.jpg)
