धार्चुलामा अलपत्र नेपालीलाई भारतमै क्वारेन्टाइनमा राखियो
<p>दार्चुला। लकडाउनका कारण धार्चुलामा अलपत्र परेका नेपालीलाई भारतमै क्वारेन्टाइनमा राखिएको छ।</p>
<p>कोभिड-१९ को सम्भावित जोखिमलाई ध्यान दिँदै नेपाल आउन नदिने प्रशासनको निर्णयसँगै उनीहरूलाई धार्चुलामै क्वारेन्टाइनमा राखिएको दार्चुलाका सीडीओ यदुनाथ पौडेलले जानकारी दिए।</p>
<p>५६३ जनालाई त्यहाँको विद्यालय र सार्वजनिक भवनसमेत चार स्थानमा १४ दिनका लागि राखिएको पौडेलले बताए।</p>
<p>भारतीय पक्षसँग छलफल गरी धार्चुलामा रहेका नेपालीलाई लडकडाउनको अवधिभर नेपाल प्रवेश गर्न नदिने निर्णय गरिएसँगै उनीहरुको व्यवस्थापन गरिएको हो।</p>
<p>उनीहरुको खाने-बस्ने व्यवस्था भारत सरकारले गर्ने र कुनै समन्वय गर्नुपरेको खण्डमा नेपालले सहजिकरण गर्ने समझदारी बनेको छ।</p>
<p>भारतका पिथौरागढका विभिन्न क्षेत्रमा मजदुरी गर्दै आएका उनीहरू कोरोना भाइरस संक्रमणको त्राससँगै घर फर्किएका हुन्।</p>
<p>तर, लकडाउनका कारण सीमा बन्द भएपछि झण्डै ५५० नेपाली भारतको धार्चुलामा अलपत्र परेका थिए।</p>
<p>उनीहरुमध्ये केही नेपाली ट्युबको सहायताले जोखिम मोलेर महाकाली नदीमा पौडेर नेपाल छिरेका छन्।</p>
प्रतिक्रिया दिनुहोस्
.jpg)
