Others

गृहपृष्ठ

कोरोना भाइरस सङ्क्रमित युवतीलाई बागलुङसम्म पुर्‍याउने चालकको पहिचान कास्की। बागलुङकी कोरोना भाइरस सङ्क्रमित १९ वर्षीया एक युवतीलाई पोखराबाट उनको घरसम्म पुर्&zwj;याउने स्कार्पियो गाडीका चालकको पहिचान भएको छ।  पोखरा महानगरपालिका–२५ स्थायी घर भई हाल माछापुच्छ्रे गाउँपालिका–३ बस्ने चालकलाई अहिले घरमै सेल्फ–क्वारेन्टाइनमा दैनिक स्वास्थ्यकर्मी र स्थानीय जनप्रतिनिधिको निगरानीमा राखिएको छ। उनको स्वास्थ्य अवस्था सामान्य छ रहेको चिकित्सकहरूले बताएका छन्। उनलाई दैनिक तीन पटक स्वास्थ्यकर्मीले तापक्रम लिने गरेका छन्।      युवतीलाई १५ चैतमा कोरोना भाइरस सङ्क्रमण भएको पुष्टि भएको थियो।  त्यसपछि पोखराबाट बागलुङ घरसम्म पुग्न उनले गाडी रिजर्भ गरेको खुलेपछि गाडीका चालकको खोजी शुरू भएकोमा १६ चैतमा चालक स्थानीय जनप्रतिनिधिको सम्पर्कमा आएका हुन्। सोही दिन परीक्षणका लागि पोखरा पुगेका उनमा कोरोनासँग मिल्दोजुल्दो कुनै पनि लक्षण नदेखिएकाले सामान्य तापक्रम जाँच गरेर घरमा पठाइएको थियो। स्थानीयवासीले भने उनको स्वाब परीक्षण गर्न माग गरेका छन्। ४ चैतपछि लामो समय चालकको अन्य व्यक्तिसँग सम्पर्क भएकाले स्थानीयवासीले उनको स्वाब परीक्षणको माग गरेका हुन्। वडाध्यक्ष सूर्यप्रसाद लम्सालले चालक अहिले घरमा नै रहेको र दैनिक स्वास्थ्यकर्मी पुगेर तापक्रम जाँच्ने र निगरानीमा राख्ने काम भएको बताए। “चालक अहिले हामीहरूको दैनिक निगरानीमा रहनुभएको छ। उहाँमा अहिले कुनै पनि स्वास्थ्य समस्या देखिएको छैन”, वडाध्यक्ष लम्सालले भने।  चालकले भने पोखरा स्वास्थ्य विज्ञान प्रतिष्ठानमा आफू परीक्षणका लागि गएको तर, कुनै पनि लक्षण नदेखिएसम्म स्वाब परीक्षण नगर्ने भनी चिकित्सकले घर पठाएको बताए। प्रदेश स्वास्थ्य निर्देशनालयका निर्देशक डा. विनोदविन्दु शर्माले चालक आफूहरूको सम्पर्कमा रहेको तथा स्वास्थ्य अवस्था सामान्य रहेको बताए। व्यक्तिमा कुनै पनि लक्षण नदेखिँदासम्म नमूना सङ्कलन गर्न नमिल्ने भएकाले चालकलाई घरमै सुरक्षित साथ बस्न आग्रहसहित पठाइएको उनले बताए।      गण्डकी प्रदेशमा २० जनाको नेगेटिभ, एकको पोजिटिभ      गण्डकी प्रदेशमा कोरोना भाइरसको आशङ्कामा १७ चैत साँझसम्म ३२ वटा नमूना परीक्षणका लागि सङ्कलन गरिएकामा त्यसमध्ये २१ जनाको रिपोर्ट आइसकेको छ। त्यसमध्ये २० जनाको नेगेटिभ आएको छ भने एक जनाको पोजिटिभ रिपोर्ट आएको प्रदेश स्वास्थ्य निर्देशनालय पोखराका स्वास्थ्य शिक्षा प्रशिक्षक नवराज शर्माले बताए। पोजिटिभ बागलुङकी एक युवतीमा देखिएको थियो। बाँकीको नतिजा आउन बाँकी रहेको छ।      कोरोना सङ्क्रमण फैलन नदिनका लागि हालसम्म प्रदेशअन्तर्गतका विभिन्न जिल्लामा ६४ वटा क्वारेन्टाइनस्थलमा एक हजार ३५२ शय्या तयारी अवस्थामा राखिएको छ। केही क्वोन्टाइनमा वैदेशिक रोजगारीबाट फर्किएकालाई राखिएको समेत बताइन्छ।      त्यसैगरी हालसम्म विभिन्न अस्पतालमा २९९ आइसोलेसन शय्या तयार गरिएको छ। प्रदेशमा एक जना सङ्क्रमित भेटिइसकेकाले सङ्क्रमण थप फैलन नदिनका लागि सङ्क्रमितको उपचार र व्यवस्थापन, कन्ट्र्याक्ट ट्रेसिङ, द्रुत प्रतिकार्य टोली (आआरटी) परिचालनलगायतलाई तीव्रता दिइएको स्वास्थ्य निर्देशनालयले जनाएको छ।      प्रदेश स्वास्थ्य निर्देशनालय प्रादेशिक स्वास्थ्य आपत्कालीन कार्यसञ्चालन केन्द्रमा कोरोनाका बारेमा जानकारी लिन/दिनका लागि बिहान आठदेखि साँझ पाँच बजेसम्म ‘हेल्लो डक्टर हटलाइन सेवाः १०९२’ शुरूआत गरिएकामा हालसम्म १०५ जनाले सेवामार्फत् कोभिड–१९ तथा अन्य स्वास्थ्यसम्वन्धी परामर्श लिएका छन्।   हटलाइन सेवामा सर्वसाधारणले कोरोनाका बारेमा सम्पूर्ण जानकारी तथा मिल्दोजुल्दो लक्षण भएमा चिकित्सकको परामर्शसमेत लिनसक्ने व्यवस्था गरिएको छ। रासस