Others

गृहपृष्ठ

मालवाहक गाडीमा लुकिछिपी यात्रा काठमाडाैं। सरकारले गरेकाे लकडाउनको समयमा १४ र १५ चैतमा चितवनको आँपटारीबाट ट्राफिक प्रहरीले १४ वटा ट्रकसहित १६ गाडी नियन्त्रणमा लियो। एउटा ट्रकसहित तीन गाडी भारतीय नम्बर प्लेटको थियो। उक्त गाडीमा लुकेर गएका ४७४ व्यक्ति कोचिएर यात्रा गरिरहेको अवस्थामा भेटिए। ट्रक काठमाडौंमा खाद्यान्न छाडेर फर्किएको थियो। भारतीय गाडी कसरी गयो प्रहरीलाई पनि पत्तो छैन। जिल्ला ट्राफिक प्रहरी कार्यालय चितवनका प्रमुख प्रहरी निरीक्षक दयाकृष्ण भट्टका अनुसार गाडीलाई आवश्यक जरिवाना तिराएर जहाँबाट मानिस ल्याएको हो, त्यहीँ फिर्ता गरिएको थियो। १२ चैतमा काठमाडौंबाट चितवन, हेटौंडा हुँदै वीरगञ्ज पुगेको ट्रकलाई पनि ७२ यात्रुसहित प्रहरीले नियन्त्रणमा लियो। यसरी जाने कतिपय मजदुर जबर्जस्ती गाडीमा चढेको पाइए पनि कतिपयले भने अनुचित लाभमा मजदुर लाने गरेको देखिएको प्रहरीले जनाएको छ। खाद्यान्नलगायत सामग्री लिएर आएका गाडी फर्किंदा यसरी मानिस बोक्न प्रयोग भएकाे देखिएको छ। अत्यावश्यक कामका लागि हिँडेका गाडीले आफ्नो प्रयोजनको दुरुपयोग गरेको आशंकामा प्रहरीले अहिले कडाइ गरेको महानगरीय प्रहरी परिसरका प्रहरी नायव उपरीक्षक होविन्द्र बोगटी बताउँछन्। केही घटना देखिएपछि प्रहरीले टोली खटाएर अनुगमन थालेको बोगटीले बताए। उपत्यकाबाट बाहिरिने नाकामा विशेषगरी साँझ र रातिको समयमा यो क्रम अहिले पनि जारी छ। मालवाहक सवारीमा लुकिछिपी यात्रा बढ्दो छ। यस्ता सवारी रातारात गन्तव्यमा पुग्ने गरेका छन्। प्रहरीको फितलोपन देखिएको गुनासो बढेको छ। काठमाडौँको बल्खुमा गएराति पनि मानिसको बाक्लो भीडभाड थियो। महानगरीय प्रहरी वृत्त बल्खुका प्रहरी नायव निरीक्षक वीरेन्द्रप्रसाद चौधरी तरकारी बोक्ने गाडीले मान्छे बोकेको घटना देखिएकाले बल्खु नाकालाई कडाइका साथ अनुगमन गरिएको बताउँछन्। <blockquote> सरकारले समस्यामा परेका मजदुरलाई आवश्यक राहत दिने घोषणा गरिसकेको छ। त्यसको लगत सङ्कलनलगायत काम ढिलाइका कारण तत्कालै सहयोगमा विलम्ब हुने देखिएको छ। त्यसैले मजदुरहरू हतारिएर रातारात उपत्यका छाड्ने क्रम बढेको हो। </blockquote> प्रहरीको आँखा छलेर जाने क्रम भने रोकिएको छैन। अलि पर हिँडेर जाने अनि गाडी चढ्ने क्रम देखिँदै आएको छ। मजदुरले भने काठमाडौंमा बस्न सक्ने अवस्था नभएकाले आफ्नो घर फर्किएको दुःखेसो गरेका छन्। कतिपय उद्योग व्यवसाय सञ्चालकले आफ्ना मजदुरलाई पालेर राखिराख्न नसक्ने भएकाले पनि पठाउने गरेको सूचना प्रहरीमा आइपुगेको छ। कतिपय मजदुर भने जबर्जस्ती जाने गरेका छन् । गाडी फर्कन लागेको देख्ने बित्तिकै सडकमा रहेका मजदुरहरू दगुरेर चढ्न गरेका छन्। “खाने अन्न छैन, यहाँ मरे पनि मर्ने हो, घरमा मरे पनि मर्ने हो, सबै परिवार घरमा छन्, हामी जान्छम्, हामीलाई नरोक्नु सर”, रौतहट जान लाग्नुभएका एक मजदुरले आफ्नो पीडा सुनाए। चितवन जिल्लाका ट्राफिक प्रमुख प्रहरी निरीक्षक भट्ट जबर्जस्ती ट्रकमा चढेपछि बाध्य भएर मजदुर बोकेर ल्याउनु परेको चालकले बताएको जानकारी दिए। कतिपय मजदुर अहिले पनि अलपत्र अवस्थामा छन् । काम नपाएकाले उपत्यकामा दैनिक जोहो गर्न सक्ने अवस्था छैन। सरकारले समस्यामा परेका मजदुरलाई आवश्यक राहत दिने घोषणा गरिसकेको छ। त्यसको लगत सङ्कलनलगायत काम ढिलाइका कारण तत्कालै सहयोगमा विलम्ब हुने देखिएको छ। त्यसैले मजदुरहरू हतारिएर रातारात उपत्यका छाड्ने क्रम बढेको हो। एक सातापछि ‘लकडाउन’ खुल्ने आशा गरिएकामा अर्काे साता थपिएपछि झन मारमा परेको मजदुरले गुनासो गरेका छन्। खाद्यान्न अभावमा निम्तिने आपराधिक घटनालाई ध्यान दिँदैै महानगरीय प्रहरी कार्यालय काठमाडौंले राहत अभियान नै थालेको छ। कार्यालयका प्रमुख प्रहरी नायव महानिरीक्षक विश्वराज पोखरेलले बताए। “समस्या भए कार्यालयमा सम्पर्क गर्नुहोस्, हामी राहत लिएर आउँछौँ।” सरकारले ११ चैतदेखि अत्यावश्यक कामबाहेक बाहिर ननिस्किन आदेश जारी गरेको थियो। उक्त आदेशको समय आज बिहान ६ बजेदेखि सकिएपछि १६ चैतमा बसेको मन्त्रिपरिषद् बैठकले २५ चैत राति १२ बजेसम्मका लागि लागू हुने गरी लकडाउनलाई निरन्तरता दिने निर्णय गरिसकेको छ। मुलुकमा कोभिड–१९ संक्रमणको जोखिम भएकाले सरकारले उक्त आदेश जारी गरेको हो। रासस