विपन्नलाई खाद्यान्नकाे जाेहाे गर्दै धनगढी उपमहानगरपालिका
<p>कैलाली। लकडाउनका कारण छाक टार्न समस्या भएका व्यक्ति तथा परिवारलाई धनगढी उपमहानगरपालिकाले खाद्यान्न सामग्री उपलब्ध गराउने भएको छ।</p>
<p>अतिविपन्न, असहाय र ज्याला मजदुरी गरेर खानेहरूलाई भाेलि, १९ चैतदेखि धनगढी उपमहानगरपालिकाले राहतस्वरूप खानाको जोहो गरिन लागेको धनगढी उपमहानगरपालिकाका प्रमुख नृपबहादुर वडले बताए।</p>
<p>उनले लकडाउनको अवस्थामा खानपिनमै समस्या भएकाहरूलाई साँझबिहानको छाक टार्ने प्रबन्ध गर्ने बताए।</p>
<p>लकडाउनको समयमा विभिन्‍न संघसस्था तथा व्यक्तिहरूले उपलब्ध गराएको खाद्यान्न र बाँकी उपमहानगरपालिकाले खाद्यान्नको व्यवस्था गरेको प्रमुख वडले बताए।</p>
<p>उनले अहिले प्रत्येक विपन्न परिवारलाई १० किलाे चामल, दुई किलाे दाल, आधा लिटर खाने तेल, एक किलाे नुन, एक प्याकेट चिउरा, आलु दुई किलाे र एक किलाे प्याज उपलब्ध गराउने बताए ।</p>
<p>उनले लकडाउनका कारण छाक टार्न समस्या भएका व्यक्ति तथा परिवारलाई खाद्यान्न सामग्री उपलब्ध गराउने भएकाले यथाशीघ्र त्यस्ता परिवारको संख्या उपमहानगरपालिकाको विपद् व्यवस्थापन शाखालाई उपलब्ध गराउन आग्रहसमेत गरेका छन्।</p>
<p>साथै खाद्यान्न सामग्री वितरणका लागि वडाध्यक्षको संयोजकत्वमा सर्वदलीय/सर्वपक्षीय समितिसमेत आजै गठन गरिने प्रमुख वडकाे भनाइ छ।</p>
प्रतिक्रिया दिनुहोस्
.jpg)
