Others

गृहपृष्ठ

उपप्रधानमन्त्री पोखरेलले भने- ‘भावनात्मक कुराले मात्रै विपत्तिसँग जुध्‍न सकिँदैन’ काठमाडाैं। सरकारले लकडाउनको समयमा जो जहाँ छ, त्यहीं व्यवस्थापन गर्ने र सीमानाका भने नखोल्ने भएको छ। भारतबाट नेपाल फर्कन चाहनेसमेत उतै बस्नुपर्ने र नेपालमा रहेका भारतीय नागरिकसमेत भारत फर्कन नपाउने भएका छन्। कोरोना भाइरसको संक्रमण फैलन सक्ने त्रासका बीचमा दुई देशको सीमानाका बन्द भएको छ। याे अवस्थामा नेपाल फर्कन खोजेका नेपाली नागरिकको संख्या दशगजा क्षेत्रमा देखिएका बेला उपप्रधानमन्त्री एवं रक्षामन्त्री ईश्वर पोखरेलले भावनात्मक कुराका आधारमा मात्रै विपत्तिसँग जुध्न नसकिने बताएका छन्। कोभिड-१९ संक्रमण रोकथाम तथा नियन्त्रण उच्चस्तरीय समन्वय समितिका संयोजकसमेत रहेका मन्त्री पोखरेलले सीमानाका बन्द भएपछि पनि स्वदेश फर्किन दशगजा क्षेत्रमा जम्मा भएका नेपाल र भारत दुवै देशका नागरिकलाई जो जहाँ छन् त्यही देशको सरकारले व्यवस्थापन गर्ने गरी व्यवस्था मिलाइएको जानकारी दिए। “भारतका विभिन्न स्थानमा रोजगारी तथा अन्य सिलसिलामा पुगेका नेपाली नागरिक देश फिर्ताको माग गर्दै आएका छन्। केही नेपाली पौडेर महाकाली नदीसमेत पार गरेर आएका छन्। त्यसबाट कोरोना भाइरसको संक्रमण फैलन सक्ने अवस्थालाई ध्यानमा राखेर जो जहाँ छन्, त्यहीं राख्ने गरी व्यवस्था गरिएको हो”, मन्त्री पोखरेलले भने, “भावनात्मक हिसाबले त उहाँहरूलाई फर्कन दिनुपर्छ भन्ने कुरा स्वभाविक नै हो, तर यो भावना भन्दा परको विषय हो। विपद्&zwj;मा जो जहाँ छौँ, त्यहीँ बसौँ।” भारतीय सीमाभित्र रहेका नेपालीको व्यवस्थापन भारतीय पक्षले गर्ने र नेपालमा रहेका भारतीय नागरिकको व्यवस्थापन नेपालले गर्ने नै तत्कालको लागि सबैभन्दा उत्तम विकल्प भएको उनको भनाइ छ। विशेष गरी दार्चुलाको सीमापारि धार्चुला र कैलालीको नेपाल भारत सीमा क्षेत्रमा केही नेपाली जम्मा भई बसेका छन्। जोखिमपूर्ण वा संकटको समयमा विश्व स्वास्थ्य संगठनको प्रोटोकलले समेत जो जहाँ छन्, त्यही सुरक्षित राख्ने वा रहन दिने भनेको छ। यस्तै उनले कोरोना भाइरसको परीक्षण, रोकथाम तथा अन्य व्यवस्थाका लागि सरकारले जुनसुकै खालको पनि प्रयत्न गर्ने र त्यसमा साथ सहयोग नेपाली नागरिक तथा सम्बद्ध सरोकार भएका सबै क्षेत्र र निकायको रहनुपर्ने उपप्रधानमन्त्री पोखरेलको भनाइ छ। चीनबाट ल्याइएका मेडिकल सामग्री तथा अन्य उपकरणका विषयमा अनावश्यक हल्ला चलाइएको भन्दै उपप्रधानमन्त्री पोखरेलले जोसुकै व्यापारी तथा सामान आयातकर्तालाई पनि सामान ल्याउन आग्रह गर्दासमेत नमानेका कारण छोटो बाटो अपनाउनुपरेको जानकारी दिए। विपद्को समयमा सबैका साथ सहयोग जरुरी रहेको भन्दै अनावश्यक हल्ला, टीका टिप्पणीले यस्तो समयमा काम नगर्ने उनको कथन छ। सरकारले आवश्यक परेको खण्डमा जुनसुकै देशबाट पनि ‘जी टु जी’ अवधारणमा सामान आयात गर्न सक्ने स्पष्ट पारे। “सरकार नागरिकको अभिभावक पनि हो। आवश्यक पर्दा विषम परिस्थितिमा विषम निर्णय पनि लिन्छ। त्यसका लागि सरकार तयार छ”, उनले भने। उनले निजी अस्पताल र मेडिकल कलेजले समेत सरकारलाई साथ दिने र सहयोग गर्ने बताएको र एकाधले केही कमजोरी गरेको भए पनि सरकारको आग्रहलाई स्वीकार गर्ने विश्वास व्यक्त गरे। लकडाउनको समयमा सबै नेपाली नागरिक इमान्दार भएर घर तथा आफ्नै निवासमा रहेर देश र आफ्नैसमेत सुरक्षा गर्नुपर्ने उनको भनाइ छ। उनले विपद् समग्र मानव सभ्यता र संस्कृतिविरुद्धको प्रहार भएकाले यसमा सबैको उत्तिकै साथ र सहयोग रहनुपर्नेमा उपप्रधानमन्त्री पोखरेलले जोड दिए। मन्त्रिपरिषद् बैठकले दैनिक ज्यालादारी तथा श्रमिक वर्गका लागि विशेष राहत प्याकेज ल्याएको र त्यसको व्यवहारिक कार्यान्वयन गरिने भएकाले त्यस्ता व्यक्ति वा वर्गलाई नआत्तिनसमेत उपप्रधानमन्त्री पाेखरेलले आग्रह गरे।