कोरोना संक्रमणको पहिचान गर्न स्थानीय तहलाई मुख्यमन्त्रीको आग्रह
<p>विराटनगर। प्रदेश-१ का मुख्यमन्त्री शेरधन राईले आफ्नो प्रदेशमा कोरोना भाइरस संक्रमणको आशंका गरिएका नागरिकको पहिचानमा जुट्न स्थानीय तहहरूलाई निर्देशन दिएका छन्।</p>
<p>कोरोना भाइसरको रोकथाम तथा प्रतिरक्षाका लागि गठित स्थानीय तह सम्पर्क, समन्वय, प्रचार प्रसार तथा जनचेतना समितिको मंगलबारको बैठकमा मुख्यमन्त्री राईले त्यस्तो निर्देशन दिएका हुन्। </p>
<p>विदेशबाट आएका, होम क्‍वारेन्टाइनमा रहेका र क्‍वारेन्टाइनमा राख्नुपर्नेको तथ्यांक संकलन गर्न उनले आग्रह गरे।</p>
<p>प्रदेश-१ कोरोना रोकथाम, प्रतिरक्षा र उपचार निर्देशन समितिको अध्यक्ष समेत रहेका राईले विशेष हेरचाह गर्नुपर्ने सुत्केरी, गर्भवती, अपांगता भएकाहरू र दैनिक ज्यालादारीमा काम गर्नेहरूको विवरण पनि संकलन गर्न आग्रह गरे।</p>
<p>विपन्न र दैनिक ज्यालादारीमा जीविका चलाउनुपर्नेहरूलाई स्थानीय तहबाटै राहत उपलब्ध गराउन र सम्भव नभए प्रदेश सरकारले व्यवस्था मिलाउने पनि बताए।</p>
<p>बैठकले कोरोना भइरसको संक्रमणविरुद्ध पालिकाहरूको नेतृत्वमा स्थानीय तहमा विभिन्‍न समिति गठन गर्ने, राहत वितरणमा एकद्वार प्रणाली अपनाउनेलगायत निर्णय गरेको छ।</p>
<p>लकडाउनको अवधिमा कृत्रिम अभाव हुन नदिन र नागरिकलाई पर्ने समस्याका विषयमा अनुगमन गर्न आर्थिक मामिला तथा योजनामन्त्री इन्द्र आङ्वोको संयोजकत्वमा १० सदस्यीय अनुगमन समिति पनि गठन गरेको छ। समितिका सदस्यमा राज्यमन्त्रीहरू, विपक्षीदलका नेता, समाजवादी पार्टी, लिम्बुवान पार्टी र राप्रपाका नेता, प्रदेश योजना आयोगका उपाध्यक्ष, प्रमुख न्यायाधिवक्ता र मुख्यमन्त्रीका आर्थिक सल्लाहाकार छन्।</p>
<p>तत्काल राहत, उद्धार, उजुरी, गुनासो र सुझाव भए प्रदेश सरकारको कोरोेना सूचना डेस्क र मोबाइल एपमार्फत जानकारी दिनसमेत बैठकले सबैलाई अपिल गरेको छ।</p>
प्रतिक्रिया दिनुहोस्
.jpg)
