रसुवागढी नाका खोल्दा कोरोना भित्रिने भन्दै गाउँपालिकाको आपत्ति
<p>काठमाडौं। संघीय सरकारले उत्तरतर्फको व्यापारिक नाका सञ्‍चालन गर्ने निर्णय गरेको १० दिन बित्दा पनि चीनसँगको व्यापारिक नाका सञ्‍चालनमा आउन सकेको छैन।</p>
<p>संघले गरेको निर्णयमा स्‍थानीय तह (चीनसँग नाका जोडिएका गाउँपालिका) ले असहयोग गर्दा चीनतर्फको व्यापारिक नाका सञ्‍चालनमा आउन नसकेको हो।</p>
<p>उपप्रधानमन्त्री ईश्‍वर पोखरेल नेतृत्वको कोरोना भाइरस रोकथाम तथा नियन्त्रण उच्चस्‍तरीय समन्वय समितिले १२ चैतमा चीनतर्फको नाका खोल्ने निर्णय गरेको थियो।</p>
<p>समितिले दुवैतर्फका नाकाबाट अत्यावश्‍यक वस्‍तुको आयात गर्न दिने निर्णयसहित विगत दुई महिनादेखि बन्द रहेको नाका सञ्‍चालनमा ल्याउने निर्णय गरेको हो।</p>
<p>दक्षिणी छिमेकी भारत कोरोना भाइरस रोकथाम तथा नियन्त्रणका लागि पूर्ण लकडाउनमा छ। सोहीकारण भारततर्फबाट आयात गरिने वस्‍तुको परिमाणमा कमी आउने भन्दै चीनसँगको नाका खोल्ने निर्णय भएको थियो।</p>
<p>विगत दुई महिनादेखि बन्द अवस्‍थामा रहेको नाका सञ्‍चालनमा ल्याउनका लागि चिनियाँ पक्षले नेपाललाई पटक-पटक अनुरोध गर्दै आएको थियो। सोहीकारण सरकारले दुवैतर्फका नाका सञ्‍चालनमा राख्‍ने निर्णय गरेको थियो।</p>
<p>तर, निर्णय भएको १० दिन बित्दा पनि नाकाबाट नेपालमा सामान आयात गर्न सकिएको छैन।</p>
<p>खासगरी, चीनसँग व्यापारिक नाका जोडिएको भोटेकोसी गाउँपालिका (तातोपानी) र गोसाइकुण्ड गाउँपालिका (रसुवागढी)ले असयोग गर्दा नाका सञ्‍चालनमा आउन नसकेको हो।</p>
<p>भोटेकोसी गाउँपालिकाले भने नाका खुला रहेको बताएको छ। तर, उक्त नाकाबाट हालसम्म सामान आयात हुन नसकेको उद्योग, वाणिज्य तथा आपूर्ति मन्त्रालयले बताएको छ।</p>
<p>तर, गोसाइकुण्ड गाउँपालिकाले विज्ञप्ति नै निकालेर नाका सञ्‍चालन गर्ने निर्णय फिर्ता लिन संघलाई अनुरोध गरेको छ। विज्ञप्तिमा भनिएको छ, “रसुवागढी नाका सञ्‍चालनमा ल्याउँदा जनताको शान्तिसँग बस्‍न पाउने अधिकार हनन् हुन्छ।”</p>
<p>यस्‍तै, सरकारले गरेको उक्त निर्णयमाथि वडाले घोर आपत्ति जनाएको विज्ञप्तीमा उल्लेख छ।</p>
<p>उत्तरतर्फको नाका खोल्ने सरकारको निर्णयलाई नमान्दा समस्‍या उत्पन्‍न भएको मन्त्रालयका सहप्रवक्ता उर्मिला केसीले बताइन्। उनले भनिन्, “चीनतर्फ सिमाना जोडिएका गाउँपालिकाले जस्‍तै भारतसँग सीमा जोडिएका स्‍थानीय तहले पनि नाका बन्द गर्ने निर्णय गरे समस्‍या हुन्छ।”</p>
प्रतिक्रिया दिनुहोस्
.jpg)
