Others

गृहपृष्ठ

सिन्धुलीमा विदेशबाट आएका १७७ व्यक्ति सम्पर्कमा, सबै क्वारेन्टाइनबाहिर सिन्धुली। सिन्धुलीमा विदेशबाट घर फर्किएका १७७ जना स्थानीय सरकारको सम्पर्कमा आएका छन्।  विदेशबाट आएकाको पहिचान गर्ने क्रममा उनीहरू स्थानीय सरकारको सम्पर्कमा आएका हुन्। स्थानीय तहले जिल्ला प्रशासन कार्यालय सिन्धुलीमा पठाएको विवरण अनुसार हालसम्म विदेशबाट घर फर्किएका १७७ जना सम्पर्कमा आएको र उनीहरूमाथि निगरानी भइरहेको उल्लेख छ।      जिल्ला प्रशासन कार्यालयका सूचना अधिकारी उपेन्द्र न्यौपानेका अनुसार विदेशबाट आउने व्यक्तिको विवरण सङ्कलन कार्य जारी रहेको छ। विदेशबाट आएका व्यक्तिमाथि निगरानी बढाएको र उच्च ज्वरो र रुघाखोकी लाग्ने जस्ता लक्षण देखिएमा त्यस्ता व्यक्तिलाई तत्कालै उपचारका लागि स्वास्थ्य संस्थामा पठाउने र ती व्यक्तिको स्वाब परीक्षण गरिने व्यवस्था मिलाइएको उनको भनाइ छ।   विदेशबाट घर फर्किएकामध्ये ८५ जना भारतबाट आएका छन्। भारतबाट घर फर्किएकामध्ये कमलामाई नगरपालिकामा ३२, दुधौली नगरपालिकामा २१, गोलन्जोर गाउँपालिकामा ५, तिनपाटन गाउँपालिकामा ३, हरिहरपुरगढी गाउँपालिकामा ४, फिक्कल गाउँपालिकामा ६ र मरिण गाउँपालिकामा १४ जना रहेका छन्।  त्यस्तै तेस्रो मुलुकबाट घर फर्किएकाहरूमा कमलामाई नगरपालिकामा ८, दुधौली नगरपालिकामा १८, गोलन्जोर गाउँपालिकामा ३, तिनपाटन गाउँपालिकामा ६, घ्याङलेख गाउँपालिकामा ८, हरिहरपुरगढी गाउँपालिकामा २५, सुनकोसी गाउँपालिकामा ४, फिक्कल गाउँपालिकामा ५, मरिण गाउँपालिकामा १४ गरी कूल ९१ जना छन्। जिल्ला प्रशासन कार्यालय सिन्धुलीले सबै पालिकालाई पत्राचार गर्दै विदेशबाट आएकाको विवरण सङ्कलन गर्न आग्रह गरेको थियो। स्थानीय तहले दैनिक रूपमा अहिले पनि विवरण सङ्कलन भइरहेको जनाएको सूचना अधिकारी न्यौपानेले बताए। हालसम्म सम्पर्कमा आएका १७७ मध्ये ११ चैतयता भारतबाट २ जना मात्र आएका छन्। बाँकी उक्त मितिभन्दा अगाडि नै आएको पाइएको उनले बताए।   उनले विदेशबाट आएका व्यक्तिलाई वडा कार्यालय तथा स्थानीय जनप्रतिनिधिको सम्पर्कमा रहन आग्रह गरे। विदेशबाट आएर होम क्वारेन्टाइनमा बसिरहेको भएपनि त्यस्ता सूचना स्थानीय तह तथा जनप्रतिनिधिलाई दिन उनको आग्रह छ।      यसैगरी, जिल्ला प्रशासन कार्यालय सिन्धुलीले सवारी पास दिने कार्य बन्द गराएको छ। कोभिड–१९ को सङ्क्रमण हुनबाट बच्न सरकारले गरेको लकडाउनलाई प्रभावकारी रूपमा लागू गराउन सवारी पास बन्द गरेको सूचना अधिकारी न्यौपानेले जनाए। उनका अनुसार, १९ चैत दिउँसो १२ बजेदेखि अत्यावश्यक सेवा बाहेक अन्य सबै सवारी सञ्चालनमा पूर्ण रूपमा रोक लगाइएको हो।   २०१ शय्याको क्वारेन्टाइन र ३३ शय्याको आइसोलेसन कक्ष      सिन्धुलीमा हालसम्म २०१ शय्याको क्वारेन्टाइन र ३३ शय्याको आइसोलेसन कक्ष निर्माण गरिएको छ।      जिल्ला प्रशासन कार्यालय सिन्धुलीका अनुसार कमलामाई नगरपालिकामा ५०, दुधौली नगरपालिकामा ३०, गोलन्जोर गाउँपालिकामा २०, तिनपाटन गाउँपालिकामा २०, घ्याङलेख गाउँपालिकामा २४, हरिहरपुरगढी गाउँपालिकामा १७, सुनकोसी गाउँपालिकामा २४ फिक्कल गाउँपालिकामा ८, मरिण गाउँपालिकामा ८ गरी कूल २०१ शय्याको क्वारेन्टाइन निर्माण गरिएको छ। हालसम्म सिन्धुलीमा एक व्यक्तिलाई पनि क्वारेन्टाइनमा राखिएको छैन। यस्तै, कमलामाई नगरपालिकामा १४, दुधौली नगरपालिकामा ३, गोलन्जोर गाउँपालिकामा २, तिनपाटन गाउँपालिकामा ८, सुनकोसी गाउँपालिकामा २, फिक्कल गाउँपालिकामा २ र मरिण गाउँपालिकामा २ गरी कूल ३३ शय्याको आइसोलेसन कक्ष निर्माण गरिएको प्रशासकीय अधिकृत न्यौपानेले जानकारी दिए।  नबीनबाबु अधिकारी/रासस