लकडाउनको बेला ललितपुरको इमाडोलमा कसले किन ल्यायो १३ जना इन्डोनेसियाली नागरिक ?
<p>ललितपुर। लकडाउनको समयमा एक्कासी एक हुल विदेशी नागरिक आएपछि दुई दिनअघि ललितपुरको महालक्ष्मी नगरपालिका- ४ इमाडोलकाका वासिन्दा त्रसित बने।</p>
<p>उनीहरूबारे खबर पाएसँगै महालक्ष्मी नगरपालिकाका मेयर रामेश्‍वर श्रेष्‍ठले आफ्नो नगरमा थाहै नदिइ ल्याएर राखिएको भन्दै फिर्ता लैजान ललितपुरका प्रमुख जिल्ला अधिकारीदेखि गृह मन्त्रालयसम्म फोन गरे।</p>
<p>कोभिड-१९ फैलिन नदिन देशभर आवतजावत बन्द गरेको समयमा आएका ती १३ जना इन्डोनेसियाका नागरिक थिए। र, उनीहरूलाई महालक्ष्मी नगरपालिका-४ स्थित मस्जिदमा राखिएको थियो।</p>
<p>"कोरोना भाइरस संक्रमणको जोखिम बढेको बेला जानकारीबिना नै विदेशी ल्याएर राखेपछि स्थानीय डराउनु स्वभाविक हो। त्यही भएर मैले यहाँ नराख्न भनेको हुँ", मेयर श्रेष्‍ठले <em>देखापढी</em>सँग भने।</p>
<p>महालक्ष्मी नगरपालिकाले हिजै प्रेस विज्ञप्ति निकालेर 'सप्तरीबाट काठमाडौंको बालाजु हुँदै महालक्ष्मी नगर क्षेत्रमा ल्याउने व्यक्ति वा निकायहरूको छानबिन गरी कारबाही गर्न' माग गरेको छ। </p>
<p> ती १३ जनालाई सप्तरीबाट सुरक्षा स्कर्टिङ्‍मा ल्याएको स्रोतले बताएको छ।</p>
<p>ललितपुर प्रहरी प्रमुख एसएसपी टेकप्रसाद राईले उनीहरू बैंकक हुँदै २१ जनवरीमा नेपाल प्रवेश गरेको पाइएको जानकारी दिए।</p>
<p>"उनीहरूको 'ट्राभल हिस्ट्री' हेर्दा दुई महीनाअघि सप्तरीमा एक मुस्लिम धार्मिक सभामा आएको देखिन्छ", राईले <em>देखापढी</em>सँग भने, "महालक्ष्मीमा बस्न नदिएपछि अन्यत्र सिफ्ट गर्ने काम भइसक्यो।"</p>
<p>उनका अनुसार महालक्ष्मीको मस्जिदबाट उनीहरूलाई हिजै गोदावरी पुर्‍याइएकोमा त्यहाँ पनि स्थानीयवासीले विरोध गरेपछि अहिले सुरक्षित ठाउँमा राखिएको छ।</p>
<p>राईले भने, "ती नागरिक केही दिनअघि सुन्धाराको जामे मस्जिदमा पनि आएका रहेछन्। विदेशी भन्नासाथ कोरोनासँग जोडेर बहिष्कार गरेकाले अलि समस्या देखियो।"</p>
<p>तर, लकडाउनको संवेदनशील समयमा सप्तरीबाट पास दिएर पठाइएकोप्रति उनले आश्‍चर्य व्यक्त गरे।</p>
<p>उनीहरूलाई पास दिएर काठमाडौं पठाएको विषयमा बुझ्न खोज्दा सप्तरीका सीडीओ सुनील खनाल यसबारेमा सहायक सीडीओ आनन्दकुमार ठाकुरलाई थाहा भएकोले उनीसँगै सोध्न भनी पन्छिएका छन्।</p>
प्रतिक्रिया दिनुहोस्
.jpg)
