संसारका १९३ पार्टीले भने- मेडिकल सामग्री आदानप्रदान बढाऊ
<p>काठमाडौं। विश्‍वभरका एक सय ९३ वटा पार्टीले कोभिड-१९ विरुद्धको लडाईंमा अन्तर्राष्‍ट्रिय सहकार्यमा जोड दिएका छन्। शुक्रबार संयुक्त विज्ञप्ति प्रकाशित गर्दै ती दलहरूले त्यसका लागि अत्यावश्‍यक मेडिकल उपकरण र सुरक्षा सामग्रीको सीमापार आदानप्रदानको उचितस्तर कायम राख्‍न सुझाएका हुन्।</p>
<p>‘अहिले विश्‍व वित्तीयबजार र आपूर्ति स्थिर राख्‍नुपर्ने आवश्‍यकता छ,’ विज्ञप्तिमा उल्लेख छ, ‘विश्‍वव्यापी आर्थिक मन्दी रोक्न व्यापार सुविधाका लागि सीमाशुल्क घटाउन वा छुट दिन पनि आग्रह गर्छौं।’</p>
<p>१० बुँदे विज्ञप्तिमा दलहरूले भनेका छन्, ‘हामी सबै राष्‍ट्रलाई जनताको जीवन, सुरक्षा र स्वास्थ्यलाई सबैभन्दा माथि राख्‍न र कोभिड-१९ फैलिनबाट रोक्न ठोस तथा सशक्त कदम चाल्न आग्रह गर्छौं।’</p>
<p>कोरोना भाइरसले कुनै सीमानाको सम्मान नगर्ने र प्रकोपको समयमा कुनै राष्‍ट्रले एकल रूपमा यसका चुनौती सामना गर्न नसक्ने कुरामा विज्ञप्तिमा ध्यानाकर्षण गराइएको छ। ‘अन्तर्राष्‍ट्रिय सहकार्य, समन्वय तथा विश्‍वव्यापी स्रोत र शक्तिको परिचालनले हामीलाई यस मानवताको साझा दुश्‍मन भाइरसलाई हराउन सक्षम बनाउने छ,’ विज्ञप्तिमा भनिएको छ।</p>
प्रतिक्रिया दिनुहोस्
.jpg)
