Others

गृहपृष्ठ

कोभिड-१९ विरुद्ध थप रणनीति बनाउन ४ बजे मन्त्रिपरिषद् बैठक बस्‍ने काठमाडौं। कोभिड-१९ विरुद्ध प्रतिकार्यको थप रणनीति तय गर्न आज मन्त्रिपरिषद् बैठक बोलाइएको छ। प्रधानमन्त्री निवास बालुवाटारमा अपरान्ह ४ बजे मन्त्रिपरिषद् बैठक तय भएको एक मन्त्रीले देखापढीलाई बताए। आजको मन्त्रिपरिषद् बैठक कोभिड-१९ फैलिन नदिन जारी लकडाउनको अवस्था, रोकथाम र उपचारका लागि भइरहेका तयारी र सरकारको आगामी कार्ययोजनामा केन्द्रित हुने उनले बताए। मन्त्रालयले कोभिड-१९ विरुद्ध गरिरहेका कामको मन्त्रीहरूबाट रिपोर्टिङ्ग प्रस्तुत गर्ने र त्यसको समीक्षा गर्दै सुझाव दिन प्रधानमन्त्री केपी शर्मा ओलीले बैठक बोलाएको प्रधानमन्त्रीका प्रेस सल्लाहकार सूर्य थापाले जानकारी दिए। "यो नियमित बैठक हैन। कोरोना भाइरस संक्रमणको महामारीका सन्दर्भमा छलफल गर्न डाकिएको हो", उनले भने। उपप्रधान तथा रक्षामन्त्री ईश्वर पोखरेलको संयोजकत्वमा गठित उच्चस्तरीय समितिले कोरोना भाइरस संक्रमणसँग जुध्न गरिरहेको कामबारे बैठकमा रिपोर्टिङ हुने र त्यसकै आधारमा योजना तय बताइएको छ। यसअघि १६ चैतमा बसेको मन्त्रिपरिषद् बैठकले कोभिड-१९ महामारीको उच्च जोखिम कम नभएको निष्कर्षसहित लकडाउनको अवधि थप गरेर २५ चैत सम्म लम्ब्याउने निर्णय गरेको थियो।