लकडाउनपछि पन्ध्र सयबढी विदेशी नागरिक 'एअरलिफ्ट' बाट घर फर्किए
<p>काठमाडौं। लकडाउनको १२औं दिनको अवधिमा अहिलेसम्म पन्ध्र सय विदेशी नागरिक 'एअरलिफ्ट' बाट घर फर्किएका छन्। </p>
<p>कोरोना भाइरसको संक्रमण फैलिन नदिन सरकारले लागू गरेको देशव्यापी लकडाउनका कारण अलपत्र परेका उनीहरूलाई सम्बन्धित मुलुकको दूतावासमार्फत परराष्ट्र मन्त्रालय, अध्यागमन विभाग, नेपाल पर्यटन बोर्डसँगको समन्वयमा चार्टर्ड उडानमार्फत लगिएको हो।</p>
<p>यसैबीच आज पनि त्रिभुवन अन्तर्राष्ट्रिय विमानस्थलबाट चार देशका जहाजले चार्टर्ड उडान गर्दैछन् ।</p>
<p>जर्मनी र फ्रान्स दूतावासले कतार एअरको दुई जहाज चार्टर्ड गरी आफ्ना नागरिक लैजाने तयारी गरेका छन्।</p>
<p>उनीहरुलाई लिन दुवै जहाज काठमाडौं आइसकेका छन्।</p>
<p>त्यस्तै मलेसियाको मालिण्डो एअर, चेक रिपब्लिकन र श्रीलङ्कन एअरले आज चार्टर्ड उडान गर्ने विमानस्थलका महाप्रवन्धक देवेन्द्र केसीले जानकारी दिए।</p>
<p>कतार एअरवेजको जहाज केहीबेरमा दोहा हुँदै पेरिस पुग्ने तालिका रहेको विमानस्थलले जनाएको छ।</p>
<p>आजै मलेसियाले नेपालमा रहेका आफ्ना नागरिकलाई मलेसिया एअरलाइन्सबाट फिर्ता लैजानेछ।</p>
<p>नेपाल पर्यटन बोर्डले विभिन्न पर्यटकीय गन्तव्यमा रहेका नागरिकलाई काठमाडौं जम्मा गरी सम्बन्धित मुलुक फर्कनका लागि सहजीकरण गरिरहेको छ। <em>रासस</em></p>
प्रतिक्रिया दिनुहोस्
.jpg)
