१८ लाख कर्णालीवासीलाई तीन महीना पुग्ने खाद्यान्न मौज्दात, हिमाली जिल्लामा जहाजबाट ढुवानी
<p>सुर्खेत। लकडाउनको बेला हिमाली जिल्लामा खाद्यान्‍न अभाव हुन नदिन कर्णाली प्रदेश सरकारले जहाजबाट खाद्यान्‍न पठाउन थालेको छ।</p>
<p>कर्णालीका हुम्ला, डोल्पा र मुगु जिल्लामा सम्बन्धित निकायसँग समन्वय गरी नीजि विमानबाट खाद्यान्न ढुवानी शुरू गरिएको प्रदेश सरकारका उद्योग, पर्यटन, वन तथा वातावरण मन्त्री एवम् आपूर्ति समितिका संयोजक नन्दसिं बुढाले जानकारी दिनुभयो।</p>
<p>"लकडाउनको बेला कोही नागरिकलाई खाद्यान्न संकट नहोस् भनेर हामी गम्भीर भएर खाद्यान्न आपूर्तिमा लागेका छौँ", बुढाले भने।</p>
<p>खाद्य व्यवस्था तथा व्यापार कम्पनी कर्णाली प्रदेश कार्यालयका प्रमुख भीमबहादुर थापाले हुम्लामा हाल २०० र मुगुमा १०० क्विन्टल चामल पठाएको जानकारी जानकारी दिए।</p>
<p>“डोल्पालगायतका अन्य जिल्लामा अहिले खाद्यन्न मौज्दात नै छ,” थापाले भने, “सम्बन्धित जिल्लाले खबर पठाए हामी जतिबेला पनि पठाउन तयारी अवस्थामा छौँ।”</p>
<p>कम्पनीसँग अहिले ४४ हजार क्विन्टल खाद्यान्न मौज्दात छ।</p>
<p>थापाका अनुसार यो खाद्यान्‍नले कर्णालीको करीब १८ लाख जनसंख्यालाई झण्डै तीन महीना खान पुग्छ। <em>रासस</em></p>
प्रतिक्रिया दिनुहोस्
.jpg)
