नाका बन्द भएपछि महाकालीबाट ट्युबमा आएका थिए कंचनपुरका संक्रमित, सँगै रहेका १० जनाको रिपोर्ट भने नेगेटिभ
<p>काठमाडौं। तीनजना नयाँ संक्रमित थपिएसँगै विश्‍वव्यापी महामारीको रूप लिएको कोभिड-१९ देखिनेको संख्या नेपालमा नौ जना पुगेका छन्।</p>
<p>आज कोरोना भाइरसको संक्रमण पुष्‍टि भएकाहरूमा भारतबाट आएका कैलालीका २१ वर्षीय पुरुष र भारतबाटै आएका कंचनपुरका ४१ वर्षीय पुरुष छन्।</p>
<p>कतारबाट आएका कैलालीका संक्रमित (हाल सेती प्रादेशीक अस्पतालमा उपचाररत्) ३४ वर्षीय युवकबाट घरकै सदस्यमा संक्रमण भएपछि नेपालमा पहिलो केस ‘लोकल ट्रान्समिसन’ भएको स्वास्थ्य मन्त्रालयले जनाएको छ।</p>
<p>आज भेटिएकामध्ये कंचनपुर बेदकोट नगरपालिकाका संक्रमित ती ४१ वर्षीय पुरुष ट्युबको सहायताले १४ चैतमा महाकाली नदी हुँदै नेपाल छिरेको कंचनपुरका सीडीओ नुरहरी खतिवडाले <em>देखापढी</em>लाई बताए। </p>
<p>"लकडाउनसँगै गड्डाचौकी नाका बन्द भएपछि महाकाली नदीबाट आएको पाइयो। उनलाई सशस्त्र प्रहरीको टोलीले पक्राउसमेत गरेको थियो", उनले भने।</p>
<p>खतिवडाका अनुसार ती व्यक्तिसहित १३ जना भारतको उत्तराखण्ड राज्यको चम्पावत जिल्लामा सडक निर्माणमा मजदूर थिए। </p>
<p>"११ जनाको टोलीलाई बेदकोट नगरपालिकाको क्वारेन्टाइनमा राखिएको थियो। नेपाली सेनाले उनीहरूको थ्रोट स्वाब संकलन गरेकोमा सँगै रहेका १० जनाको भने रिपोर्ट नेगेटिभ भएको मलाई जानकारी आएको छ", उनी भन्छन्।</p>
<figure class="image" style="float:left"><img alt="" height="330" src="https://www.dekhapadhi.com/storage/photos/shares/COVID-19/kanchanpur throt swab.jpg" width="450" />
<figcaption>नमूना परीक्षणको लागि थ्रोट स्वाब लिँदै नेपाली सेनाको मेडिकल टोली।</figcaption>
</figure>
<p>नमूना परीक्षण गर्दा पोजेटिभ देखिएका ती पुरुषको अहिले सेती प्रादेशीक अस्पतालमा उपचार भइरहेको छ। उनको स्वास्थ्य अवस्था सामान्य छ। </p>
<p>कोरोना भाइरस संक्रमणको त्राससँगै भारतमा काम गर्न गएका मजदूरहरू घर फर्कने क्रम ह्वात्तै बढेको थियो। तर, लकडाउनका कारण घर फर्कन नपाएपछि हजारौँ सीमामा अलपत्र परेका थिए। </p>
<p>उनीहरूलाई अनिवार्य क्वारेन्टाइनमा बस्ने सर्तसहित घर फर्कन दिइएको थियो।</p>
<p>कोरोना त्राससँगै झण्डै एक लाखको हाराहारीमा नाकाबाट घर फर्किएको तथ्यांक रहेको कंचनपुर प्रशासनले जनाएको छ।</p>
<p>फर्किएकाहरू सुदूरपश्‍चिमका मात्र नभइ सिन्धुली र सिरहासम्मका नागरिक छन्।</p>
<p>सीडीओ खतिवडाले भने, "सबैभन्दा जोखिम त ती व्यक्तिमा अहिलेसम्म पनि लक्षण भन्ने केही देखिएको छैन। त्यसैले होशियारीपूर्वक सावधानी र सुरक्षित साथ बस्नुको विकल्प देखिएन।"</p>
<p>भारतबाट फर्किएका व्यक्तिमा कोरोना भाइरस संक्रमण देखिएसँगै आज अपरान्ह कंचनपुरमा कोभिड-१९ विरुद्धको जिल्लास्तरीय कार्यदलको बैठकको आकस्मिक बैठक बसेको छ।</p>
<p>बैठकले जिल्लामा मानिसको आवतजावतमा अझ कडाइ गर्ने निर्णय गरेको छ।</p>
<p>त्यस्तै सम्भावित जोखिमको लेखाजोखा गर्दै तयारी र प्रतिकार्यमा केन्द्र, प्रदेश सरकार र स्थानीय तहसँग समन्वय गर्ने निर्णय गरिएको छ।</p>
प्रतिक्रिया दिनुहोस्
.jpg)
