आजदेखि मास स्केलमा कोभिड-१९ को परीक्षण थालिँदै
<p>काठमाडौं। हिजो एकैदिन तीनजनामा कोभिड-१९ देखिएपछि सरकारले आजदेखि मास स्केलमा नमूना परीक्षण गर्ने भएको छ।</p>
<p>हिजो, २२ चैतमा बसेको मन्त्रिपरिषद्को बैठकले कोरोना भाइरसको बढ्दो जोखिमलाई ध्यानमा राखेर त्यसको शुरूआत तत्काललाई तीन जिल्ला कैलाली, कञ्चनपुर र बागलुङबाट गर्ने निर्णय गरेको छ।</p>
<p>त्यहाँ छिटो विधिबाट परीक्षण गर्ने र त्यसको आधारमा शंका भएका व्यक्तिलाई पिसीआर विधिबाट पुनः परीक्षण गर्ने प्रक्रिया अगाडि बढाउने निर्णय भएको छ।</p>
<p>हिजो मात्र कैलालीमा दुई र कञ्चनपुरमा एकजनामा कोरोना भाइरस संक्रमण पोजेटिभ देखिएको थियो।</p>
<p>त्यसमध्ये कैलालीमा संक्रमित महिला नेपालभित्रै संक्रमण भएकी पहिलो व्यक्ति हुन्। यसअघिका सबै जना संक्रमित विदेशबाट आएका थिए।</p>
<p>मन्त्रालयका प्रवक्ता डा. विकास देवकोटाले बाहिरबाट आएका संक्रमितबाट अर्को व्यक्तिमा संक्रमण सरेर पहिलो केस ‘लोकल ट्रान्समिसन’ भएकोले नेपाल कोभिड-१९ जोखिमको दोस्रो चरणमा प्रवेश गरेको बताएका छन्।</p>
<p>आजदेखि सरकारले थप सावधानी अपनाउँदै एक प्रदेशबाट अर्को प्रदेशमा आवागमन, जिल्ला-जिल्लाबीचको आवागमन र एक स्थानीय तहदेखि अर्को स्थानीय तहसम्मको आवागमनलाई पनि कडाइ गरेको छ।</p>
प्रतिक्रिया दिनुहोस्
.jpg)
