लकडाउनका कारण चन्द्रभैरवको जात्रा स्थगित
<p>ललितपुर। कोरोना भाइरस (कोभिड-१९) को सम्भावित जोखिम फैलिन नदिन लकडाउन भएपछि यस वर्ष बुलुगाउँको प्रसिद्ध चन्द्रभैरव जात्रा स्थगन गरिएको छ।</p>
<p>प्रत्येक वर्ष चैत एकादशीदेखि त्रयोदशीसम्म तीन दिनसम्म यो जात्रा मनाउने चलन छ। गोदावरी नगरपालिका-११ स्थित चापागाउँको बुलुमा जात्रा हुने गर्छ।</p>
<p>यस वर्ष जात्रा गर्न नसकिने भएपछि परम्परा बचाउने गरी पूजाआजा मात्र चलाउन अनुरोध गरिएको वडाध्यक्ष नीलबहादुर देशारले जानकारी दिए।</p>
<p>एकादशीमा बुलुको मुख्य चोकमा खट बनाई भैरवको राखेर पूजा गरिन्थ्यो। पूजा सकिएपछि गुठीयारले भोज गर्थे। द्वादशीको दिन भैरवलाई बुलुका श्रेष्ठहरूको आँगनमा खटमा राखी पूजा गर्ने चलन थियो। त्रयोदशीमा टोलटोलमा चन्द्रभैरव र गणेशलाई राखी पूजा गरिन्थ्यो। पूजापछि दिउँसो ४ बजेदेखि रथजात्रा गर्ने चलन रहेको चापागाउँका ७४ वर्षीय वासुदेव कर्माचार्यले बताए। उनका अनुसार चापागाउँ नामकरण हुनुअघि बुलुगाउँ भनिन्थ्यो। </p>
<p>बुलुगाउँलाई शिवपुरी पनि भनिन्थ्यो। महामञ्जुश्रीले सन्तानेश्वर महादेवको सिमाना, बाडेगाउँबीचको पहाड र चोभारको पहाडलाई तान्त्रिक तरबारले छेड्ने गरी काटेर दहको पानी निकालेको किंवदन्ती यहाँ छ। <em><strong>रासस</strong></em></p>
प्रतिक्रिया दिनुहोस्
.jpg)
