Others

गृहपृष्ठ

सुनसरीका दुई मस्जिदमा आश्रय लिएका २२ विदेशीलाई क्‍वारेन्टाइनमा राखियो काठमाडौं। सुनसरीका दुईवटा मस्जिदमा आश्रय लिएर बसेका २२ जना विदेशी नागरिकलाई प्रहरीले होम क्&zwj;वारेन्टाइनमा राखेको छ। सातजना पाकिस्तानी र १५ भारतीय नागरिकको स्वास्थ्य परीक्षणपछि क्&zwj;वारेन्टाइनमा राखिएको हो। उनीहरू मुस्लिम समुदायका बालबालिकालाई अध्ययन गराउन आएका व्यक्ति भएको जिल्ला प्रहरी कार्यालय सुनसरीका प्रवक्ता डीएसपी विनोद शर्माले जानकारी दिए।  “उनीहरू करिब दुई महिनादेखि यहाँ आएर बसिरहेका थिए,” उनले भने, “अहिले फर्किने अवस्था नरहेपछि यहीं बसिरहेका रहेका छन्।” २२ जना विदेशी नागरिक मस्जिदमा रहेको खबरपछि प्रहरीले उनीहरूलाई त्यहाँबाट उद्धार गरेर धरानस्थित बीपी कोइराला स्वास्थ्य विज्ञान प्रतिष्&zwj;ठानमा स्वास्थ्य परीक्षण गर्न लगेको थियो। “उनीहरूको स्वाब निकालेर कोरोना भाइरस (कोभिड-१९) परीक्षण गर्दा नेगेटिभ देखियो,” उनले भने, “चिकित्सककै सल्लाहअनुसार त्यहाँबाट ल्याएर अहिले मस्जिदमै उनीहरू सेल्फ क्&zwj;वारेन्टाइनमा बसिरहेका छन्।” सुनसरीको हरिनगार गाउँपालिका-१ भुटाहास्थित जामिया मस्जिदमा भारतको मुम्बईका १४ जना र इटहरी उपमहानगरपालिका-१८ पकलीस्थित जतपुर मस्जिदमा सात जना पाकिस्तानी नागरिक आश्रय लिएर बसिरहेका थिए। २-३ महिनाको भिसा लिएर भारत, पाकिस्तान, बंगलादेशसम्मका नागरिक पढाउन आउने गरेको डीएसपी शर्माले बताए। “हामीले मस्जिदमा बुझ्दा यहाँका मानिस पनि पढाउन बाहिर जाने रहेछन्। बाहिरका पनि यहाँ आएर पढाउने गर्दा रहेछन्,” उनले भने, “अहिले स्कुल बन्द भएर विद्यार्थी सबै घर गएपछि उनीहरू यहीं बसिरहेका थिए।” शुरुमा उनीहरू नयाँदिल्लीस्थित निजामुद्दिनमा आयोजित धार्मिक सभामा सहभागी भएको स्थानीयवासीले आशंका गरेका थिए। प्रहरीले त्यहाँ सहभागी भएका १० जनालाई २८ फागुनमै स्वास्थ्य जाँच गरेर क्&zwj;वारेन्टाइनमा राखेको थियो।  “हामीले समुदाय प्रहरी साझेदारी कार्यक्रम र स्थानीय तहसँगै सहकार्य गरेर हरेक वडा तहमा क्&zwj;वारेन्टाइन र नयाँ मानिसको जाँच गर्दै आएका छौं,” डीएसपी शर्माले भने, “यहाँ हरेक वडा तहमै नागरिकले पनि बाहिरबाट मानिस आए-नआएको जाँच गरेर क्&zwj;वारेन्टाइनमा राखिरहेका छन्।”