स्वास्थ्य अवस्थाकाे अनलाइन फारम भरेका मध्ये १५० जना रेडजोनमा
<p>काठमाडौं। स्वास्थ्य तथा जनसंख्या मन्त्रालयले मोबाइल एप र मन्त्रालयको वेबसाइटमार्फत् स्वास्थ्य जानकारी लिन फारम भरेकामध्ये १५० जनालाई रेडजोनमा राखेको छ।</p>
<p>मन्त्रालयले नियमित पत्रकार सम्मेलनमा क्वारेन्टाइनमा रहेमा मानिसहरूले भरेको फारमका आधारमा आज मात्रै २४ जना रेडजोनमा रहेको जानकारी दिएको हो।</p>
<p>मन्त्रालयका प्रवक्ता डा. विकास देवकोटाले क्वारेन्टाइनमा रहेका व्यक्तिहरूले आफ्नो स्वास्थ्य अवस्था उल्लेख गरेर फारम भरेकाहरूको तथ्यांक अध्ययन गरेर रेडजोनमा राखिएको बताए।</p>
<p>“यो भनेको ती व्यक्तिहरू सम्भावित हुन सक्छन् भन्ने हो”, उनले भने, “कतिपय फारम भर्नेहरूले फोन नम्बर र ठेगाना सही नराख्दा केही असहज हुन्छ। त्यसैले फारम भर्दा सही सूचना राखिदिन अनुरोध गरिन्छ।”</p>
<p>आजै मात्र एकहजार ८१२ आफ्नो स्वास्थ्य अवस्थाका बारेमा जानकारी लिन फारम भरेको उनले बताए। अहिलेसम्म ८ हजार ९७ जनाले फारम भरेका छन्।</p>
<p>उनका अनुसार आजसम्म एकहजार ५२९ को परीक्षण भएको छ। उपत्यकाभन्दा बाहिरका ६ स्थान धरान, पोखरा, सुर्खेत, हेटौंडा, धनगढी, जनकपुरमा नमूना परीक्षण भइरहेको छ।</p>
<p>बुटवलमा अझै शुरू हुन सकेको छैन। सम्भवतः भोलिदेखि शुरू मन्त्रालयकाे भनाइ छ। चितवनमा आजदेखि परीक्षण शुरू भएको छ।</p>
<p>मन्त्रालयले उपत्यकामा १२ र बाहिर १०१ जना आइसोलेसनमा रहेको जानकारी दिएको छ।</p>
<p>“संक्रमित व्यक्तिको सम्पर्कमा आएका मानिसहरूको कन्ट्याक्ट ट्रेसिङको काम निरन्तर भइरहेको छ”, उनले भने, “हिजो कैलाली र कञ्चनपुरमा भेटिएका संक्रमित व्यक्तिहरूको कन्ट्याक्ट ट्रेसिङ शुरू भइसकेको छ।” </p>
प्रतिक्रिया दिनुहोस्
.jpg)
