कोभिड-१९ : चिडियाखानाकी बघिनीलाई पनि संक्रमण
<p>न्युयोर्क। अमेरिकाको न्युयोर्कस्थित चिडियाखानामा राखिएकी एक बघिनीमा पनि कोरोना भाइरस संक्रमण (कोभिड-१९) पोजिटिभ पाइएको छ।</p>
<p>अमेरिकाको राष्ट्रिय भेटेनरी प्रयोगशालाका अनुसार चार वर्षकी ‘नाडिया’ नाम दिइएकी बघिनीबाट लिइएको नमुनामा कोभिड-१९ पोजिटिभ पाइएको हो। उक्त बघिनी, उसका दुई बहिनी, दुई बाघ र तीन अफ्रिकी सिंह सुक्खा खोकीबाट पीडित छन्।</p>
<p>बीबीसीका अनुसार चिडियाखानाका एक कर्मचारीबाट वन्यजन्तुमा कोरोना भाइरस सरेको अनुमान छ। </p>
<p>खानेकुरामा अरुचि देखाइरहे पनि पर्याप्त स्याहार दिइएकाले बघिनीको स्वास्थ्य सामान्य रहेको भेटेनरी अधिकारीहरूले बताएका छन्। सुक्खा खोकीबाट पीडित बाघ, बघिनी र सिंहको अवस्था पनि सामान्य रहेको चिडियाखानाले बताएको छ।</p>
<p>वन्यजन्तुमा कोरोना भाइरसको प्रभाव कस्तो हुन्छ भन्ने जानकारी छैन। त्यसैले ती सबैलाई निगरानीमा राखिएको चिडियाखानाले बताएको छ। चिडियाखानामा रहेका हिउँचितुवा, चितुवालगायत अन्य बाघ प्रजातिमा कोभिड-१९ को लक्षण देखिएको छैन।</p>
<p>न्युयोर्कका चारवटा चिडियाखाना गत १६ मार्चदेखि आगन्तुकका लागि बन्द छन्। कोरोना भाइरसबाट मानवको नजिकैका नातेदार गोरिल्ला, चिम्पान्जी र ओराङ्टनलगायत जीवहरू जोखिममा भएको चेतावनी संरक्षणविदहरूले दिएका छन्।</p>
प्रतिक्रिया दिनुहोस्
.jpg)
