गुणस्तरीय क्वारेन्टाइन बनाउन स्थानीय तहसँग सरकारको आग्रह
<p>काठमाडौं। संघीय मामिला तथा सामान्य प्रशासन मन्त्रालयले देशभरका स्थानीय तहहरूलाई पत्र लेखेर क्वारेन्टाइन स्थलहरूलाई मापदण्ड अनुसार परिमार्जन र स्तरोन्‍नती गर्न अनुरोध गरेको छ।</p>
<p>मन्त्रालयले प्रमुख प्रशासकीय अधिकृतहरूलाई हिजो, २३ चैतमा पठाएको पत्रमा 'कोरोना भाइरससम्बन्धी क्वारेन्टाइन संचालन तथा व्यवस्थापन गर्न बनेको मापदण्ड, २०७६' अनुरूप गुणस्तरमा ध्यान दिन निर्देशन दिएको हो।</p>
<p>मन्त्रालयले पछिल्लो समय भारतलगायतका देशबाट नेपाल प्रवेश गरेकाहरू अझै छुटेको भन्दै त्यस्ताको लगत राखेर तत्काल क्वारेन्टाइनमा राख्ने व्यवस्था मिलाउन आग्रह गरेको छ।</p>
<p>क्वारेन्टाइन अवधि सकेर गएकाहरूलाई स्वास्थ्य परीक्षण गरी भौतिक दूरी कायम गरी बस्‍न सचेत गराउँदै निरन्तर निगरानी गर्न पनि पत्रमा भनिएको छ।</p>
<p>स्वास्थ्यकर्मीको लागि पठाइएका व्यक्तिगत सुरक्षा साग्री (पीपीई) जनप्रतिनिधि र असम्बन्धित व्यक्तिले प्रयोग गरेको सम्बन्धमा पनि स्थानीय तहको ध्यानाकर्षण गराइएको छ।</p>
प्रतिक्रिया दिनुहोस्
.jpg)
